infiradiyat

auroñ se alag duniyā se judā

yaktā-e-zamāna huuñ goyā

aap apnī ḳhudī kā maz.har huuñ

naqqāsh-e-azal kā shah-pāra

jis soch meñ Duubī rahtī huuñ

sab log use kyā jāneñ

ġham aur ḳhushī kā paimāna

auroñ se hai yaksar begāna

kuchh rañg mire mahbūb-e-nazar

kuchh sher mire taskīn-e-jigar

kuchh raag haiñ aise

jo ruuh ke barbat par bajte haiñ

ḳhvāboñ ke larazte saa.e haiñ

jazboñ ke dahakte añgāre

in añgāroñ kī hiddat se

ehsās kā tābish miltī hai

ehsās kī tābish merī hai

nākām irāde TuuTe armāñ

taqdīr ke hāthoñ nauha-kunāñ

ḳhvāhish ke samundar tūfānī

kashtī ko Dubo.e dete haiñ

kashtī kī tabāhī merī hai

is dard kā darmāñ merā hai

is zaḳhm kī shiddat merī hai

sunsān añdherī rātoñ meñ

tanhā.ī kī mash.al jaltī hai

sub.hoñ kī damaktī peshānī

shāhīn-e-nazar kī manzil hai

is raat kī vahshat merī hai

is sub.h kī qurbat merī hai

vijdān-e-ḳhudī ke yaktāre par

har tarz na.ī har raag judā

mujh sā is duniyā meñ

koī bhī nahīñ hai mere sivā

is soch kī lazzat merī hai

auron se alag duniya se juda

yakta-e-zamana hun goya

aap apni KHudi ka mazhar hun

naqqash-e-azal ka shah-para

jis soch mein Dubi rahti hun

sab log use kya jaanen

gham aur KHushi ka paimana

auron se hai yaksar begana

kuchh rang mere mahbub-e-nazar

kuchh sher mere taskin-e-jigar

kuchh rag hain aise

jo ruh ke barbat par bajte hain

KHwabon ke larazte sae hain

jazbon ke dahakte angare

in angaron ki hiddat se

ehsas ka tabish milti hai

ehsas ki tabish meri hai

nakaam irade TuTe arman

taqdir ke hathon nauha-kunan

KHwahish ke samundar tufani

kashti ko Duboe dete hain

kashti ki tabahi meri hai

is dard ka darman mera hai

is zaKHm ki shiddat meri hai

sunsan andheri raaton mein

tanhai ki mashal jalti hai

subhon ki damakti peshani

shahin-e-nazar ki manzil hai

is raat ki wahshat meri hai

is subh ki qurbat meri hai

wijdan-e-KHudi ke yaktare par

har tarz nai har rag juda

mujh sa is duniya mein

koi bhi nahin hai mere siwa

is soch ki lazzat meri hai