inhen kuchh na kaho

ab ba-zāhir haiñ ye zardār inheñ kuchh na kaho

ahd-e-hāzir pe haiñ ye baar inheñ kuchh na kaho

in kā ToTe meñ hai byopār inheñ kuchh na kaho

ye haiñ girtī huī dīvār inheñ kuchh na kaho

kah chuke in ko to sau baar inheñ kuchh na kaho

aur kuchh roz haiñ mahloñ meñ charāġhāñ in ke

aur kuchh roz falak-bos haiñ aivāñ in ke

aur kuchh roz haiñ ye ūñghte darbāñ in ke

aap haiñ jaan se bezār inheñ kuchh na kaho

kah chuke in ko to sau baar inheñ kuchh na kaho

pahle mash.hūr fusūñ-kār sitamgār the ye

pahle dil-soz-o-dil-āzār jafā-kār the ye

pahle majbūroñ pe chaltī huī talvār the ye

ab haiñ TuuTī huī talvār inheñ kuchh na kaho

kah chuke in ko to sau baar inheñ kuchh na kaho

ġhair-mumkin ki haqīqat kī ho in se tā.īd

in se rakkho na kisī tarah vafā kī ummīd

ye haiñ añgrez se ustād ke shāgird-e-rashīd

ye haiñ shaitāñ ke parastār inheñ kuchh na kaho

kah chuke in ko to sau baar inheñ kuchh na kaho

ab ḳhudā ke liye doharāo na tārīḳh-e-vatan

ab zabāñ se na bayāñ in kā karo chāl-chalan

ab na tum yaad karo qissa-e-bangāl-o-dakan

ye hamesha ke haiñ ġhaddār inheñ kuchh na kaho

kah chuke in ko to sau baar inheñ kuchh na kaho

ye kisī tarah nahīñ haiñ ġham-e-fardā se barī

hone bhī do jo hai bharpūr tijorī in kī

nādirī hai kahīñ baaqī na kahīñ changezī

hai falak darpa.e-āzār inheñ kuchh na kaho

kah chuke in ko to sau baar inheñ kuchh na kaho

Thiik kar degā falak in kī bhī aqloñ kā futūr

ravish-e-bazm-e-tarab in kī bhī badlegī zarūr

haiñ bhagat singh ke ahbāb kī nazroñ meñ huzūr

in ke miTne ke haiñ āsār inheñ kuchh na kaho

kah chuke in ko to sau baar inheñ kuchh na kaho

in kā maqsad hai zamāne meñ faqat aish-e-davām

ye haiñ maqsad ke parastār to matlab ke ġhulām

paas jā jā ke 'hilāl' in ko karo tum na salām

duur se kar lo namaskār inheñ kuchh na kaho

kah chuke in ko to sau baar inheñ kuchh na kaho

ab ba-zahir hain ye zardar inhen kuchh na kaho

ahd-e-hazir pe hain ye bar inhen kuchh na kaho

in ka ToTe mein hai byopar inhen kuchh na kaho

ye hain girti hui diwar inhen kuchh na kaho

kah chuke in ko to sau bar inhen kuchh na kaho

aur kuchh roz hain mahlon mein charaghan in ke

aur kuchh roz falak-bos hain aiwan in ke

aur kuchh roz hain ye unghte darban in ke

aap hain jaan se bezar inhen kuchh na kaho

kah chuke in ko to sau bar inhen kuchh na kaho

pahle mashhur fusun-kar sitamgar the ye

pahle dil-soz-o-dil-azar jafa-kar the ye

pahle majburon pe chalti hui talwar the ye

ab hain TuTi hui talwar inhen kuchh na kaho

kah chuke in ko to sau bar inhen kuchh na kaho

ghair-mumkin ki haqiqat ki ho in se taid

in se rakkho na kisi tarah wafa ki ummid

ye hain angrez se ustad ke shagird-e-rashid

ye hain shaitan ke parastar inhen kuchh na kaho

kah chuke in ko to sau bar inhen kuchh na kaho

ab KHuda ke liye doharao na tariKH-e-watan

ab zaban se na bayan in ka karo chaal-chalan

ab na tum yaad karo qissa-e-bangal-o-dakan

ye hamesha ke hain ghaddar inhen kuchh na kaho

kah chuke in ko to sau bar inhen kuchh na kaho

ye kisi tarah nahin hain gham-e-farda se bari

hone bhi do jo hai bharpur tijori in ki

nadiri hai kahin baqi na kahin changezi

hai falak darpae-azar inhen kuchh na kaho

kah chuke in ko to sau bar inhen kuchh na kaho

Thik kar dega falak in ki bhi aqlon ka futur

rawish-e-bazm-e-tarab in ki bhi badlegi zarur

hain bhagat singh ke ahbab ki nazron mein huzur

in ke miTne ke hain aasar inhen kuchh na kaho

kah chuke in ko to sau bar inhen kuchh na kaho

in ka maqsad hai zamane mein faqat aish-e-dawam

ye hain maqsad ke parastar to matlab ke ghulam

pas ja ja ke 'hilal' in ko karo tum na salam

dur se kar lo namaskar inhen kuchh na kaho

kah chuke in ko to sau bar inhen kuchh na kaho