inkar ki nauiyat

ḳhabar kī nau'iyat se kaan garm hue jaate haiñ

shahr-dar-shahr kūḌā-dān

ġhalīz gāliyoñ se bhar chuke haiñ

tahzīb ke gul-tarāsh apnā ek haath havā meñ

aur ek haath ūñchī shalvār ke naaḌe pe rakkhe hue

chauk chauk

maut thuuk rahe haiñ

ḳhabar kā ḳhulāsa

abhī añgrezī meñ hai

lekin

ye bhaap chhoḌte sabz-o-safed-o-surma.ī o mashriqī purze

barābar se shor kiye jaate haiñ

safed shīshoñ vaalī 'ainakoñ ke biich

ye siyāh shīshoñ vaalī ainak

kyoñ maqām rakkhe jaatī hai

hālāñki nazar donoñ kī kamzor hai

ḳhair ye modern daur hai

ḳhabar kā ḳhulāsa

abhī añgrezī meñ hai

latīf kabāḌiye kī beTī ne inkār kar diyā hai ki

abhī merā mausam nahīñ aayā

ḳhabar kī nau'iyat se kaan garam hue jaate haiñ

KHabar ki nau'iyat se kan garm hue jate hain

shahr-dar-shahr kuDa-dan

ghaliz galiyon se bhar chuke hain

tahzib ke gul-tarash apna ek hath hawa mein

aur ek hath unchi shalwar ke naDe pe rakkhe hue

chauk chauk

maut thuk rahe hain

KHabar ka KHulasa

abhi angrezi mein hai

lekin

ye bhap chhoDte sabz-o-safed-o-surmai o mashriqi purze

barabar se shor kiye jate hain

safed shishon wali 'ainakon ke bich

ye siyah shishon wali ainak

kyon maqam rakkhe jati hai

haalanki nazar donon ki kamzor hai

KHair ye modern daur hai

KHabar ka KHulasa

abhi angrezi mein hai

latif kabaDiye ki beTi ne inkar kar diya hai ki

abhi mera mausam nahin aaya

KHabar ki nau'iyat se kan garam hue jate hain