inkar ki sarhad par

agar mujh se milnā hai aao milo tum

magar yaad rakhnā

maiñ iqrār kī manzileñ rāste hī meñ chhoḌ aayā huuñ

ab mujh se milnā hai tum ko to inkār kī sarhadoñ pe milo

jhīñguroñ makḌiyoñ ke janāze

maiñ raste pe chhoḌ aayā huuñ

purānī kathā.eñ mujhe khīñchtī haiñ

zamīñ kā zavāl aaj zanjīr-e-pā ban rahā hai

ḳhas-o-ḳhāk ke saare rishte

maiñ ne har shai ko ab taj diyā hai

koī ma.azarat bhī nahīñ hai

ki maiñ ma.azarat ke sabhī jhūTe lafzoñ ko

apnī luġhat se nikāl aayā huuñ

maiñ inkār ke āsmānoñ pe phirtā huā

maiñ inkār kā vird kartā huā

maiñ zamīnoñ pe aur āsmānoñ kī har shai pe

inkār kī surḳh mohreñ lagātā huā

aur damā-dam kī ik thaap pe

maiñ ne sātoñ zamīnoñ ke sātoñ tabaq aaj raushan kiye haiñ

dekhnā āsmāñ raqs karne lagā hai

zamīnoñ ke saare ḳhazāne ubalne lage haiñ

saare dafīne jaḌoñ se ukhaḌ kar

mire sāmne haath bāñdhe khaḌe haiñ

merī āvāz par machhliyāñ pāniyoñ se nikal aa.ī haiñ

aaj arz-o-samāvāt kī saarī poshīda ḳhabreñ maiñ sunñe lagā huuñ

maiñ ḳhush huuñ mujhe āgahī mil ga.ī hai

badan ke masāmoñ se ab āgahī sho.ala ban kar chamakne lagī hai

ajab kashf kī raushnī hai

zamīñ apnī sat.h se pātāl tak raushnī meñ nahā kar

shab-e-avvalīñ kī dulhan kī tarah aaj sharmā rahī hai

taaza havāoñ kī doshīzgī saat rañgoñ meñ barahna huī hai

hayāoñ kī surḳhī se chehra kañval hai

ki merī dulhan kā badan phuul hai

vo havāoñ ke rañgoñ meñ Duubī huī hai

havāoñ kī doshīzgī saat rañgoñ meñ barahna huī hai

har ik shai naqāb apnā ulTe hue hai

sabhī bhed apnī zabāneñ nikāle mire sāmne aa ga.e haiñ

kitāboñ ke aurāq ḳhud bolte haiñ

zamīñ āsmāñ kī har ik shai

samundar havā.eñ zamīnoñ kī sat.heñ

sat.hoñ ke nīche sadiyoñ ke chehre

pahāḌoñ kī barfeñ barfoñ ke shorīda paanī

sadiyoñ ke pyāse samundar ke sāhil daraḳhtoñ ke patte

phūloñ ke chehre aur roz-o-shab ke safed-o-siyāh silsile

har ik shai mujhe apne bhedoñ se asrār se

āshnā kar rahī hai

ajab āshnā.ī kī lazzat milī hai

maiñ is āshnā.ī kī lazzat se sarshār ho kar

muqaddas zamīñ ke purāne dukhoñ ko gale se lagā kar

maiñ iqrār kī manzileñ rāste hī meñ chhoḌ aayā huuñ

maiñ saarī purānī kathā.eñ jalā kar

faqat ik damā-dam kī āvāz par raqs kartā huā

maiñ iqrār kī sarhadoñ se pare aa gayā huuñ

ab mujh se milnā hai tum ko

to aao milo

magar yaad rakhnā

maiñ iqrār kī dushmanī par utar aayā huuñ

ab maiñ inkār kī sarhadoñ pe milūñgā

agar mujh se milna hai aao milo tum

magar yaad rakhna

main iqrar ki manzilen raste hi mein chhoD aaya hun

ab mujh se milna hai tum ko to inkar ki sarhadon pe milo

jhinguron makDiyon ke janaze

main raste pe chhoD aaya hun

purani kathaen mujhe khinchti hain

zamin ka zawal aaj zanjir-e-pa ban raha hai

KHas-o-KHak ke sare rishte

main ne har shai ko ab taj diya hai

koi mazarat bhi nahin hai

ki main mazarat ke sabhi jhuTe lafzon ko

apni lughat se nikal aaya hun

main inkar ke aasmanon pe phirta hua

main inkar ka wird karta hua

main zaminon pe aur aasmanon ki har shai pe

inkar ki surKH mohren lagata hua

aur dama-dam ki ek thap pe

main ne saton zaminon ke saton tabaq aaj raushan kiye hain

dekhna aasman raqs karne laga hai

zaminon ke sare KHazane ubalne lage hain

sare dafine jaDon se ukhaD kar

mere samne hath bandhe khaDe hain

meri aawaz par machhliyan paniyon se nikal aai hain

aaj arz-o-samawat ki sari poshida KHabren main sunne laga hun

main KHush hun mujhe aagahi mil gai hai

badan ke masamon se ab aagahi shoala ban kar chamakne lagi hai

ajab kashf ki raushni hai

zamin apni sath se patal tak raushni mein naha kar

shab-e-awwalin ki dulhan ki tarah aaj sharma rahi hai

taza hawaon ki doshizgi sat rangon mein barahna hui hai

hayaon ki surKHi se chehra kanwal hai

ki meri dulhan ka badan phul hai

wo hawaon ke rangon mein Dubi hui hai

hawaon ki doshizgi sat rangon mein barahna hui hai

har ek shai naqab apna ulTe hue hai

sabhi bhed apni zabanen nikale mere samne aa gae hain

kitabon ke auraq KHud bolte hain

zamin aasman ki har ek shai

samundar hawaen zaminon ki sathen

sathon ke niche sadiyon ke chehre

pahaDon ki barfen barfon ke shorida pani

sadiyon ke pyase samundar ke sahil daraKHton ke patte

phulon ke chehre aur roz-o-shab ke safed-o-siyah silsile

har ek shai mujhe apne bhedon se asrar se

aashna kar rahi hai

ajab aashnai ki lazzat mili hai

main is aashnai ki lazzat se sarshaar ho kar

muqaddas zamin ke purane dukhon ko gale se laga kar

main iqrar ki manzilen raste hi mein chhoD aaya hun

main sari purani kathaen jala kar

faqat ek dama-dam ki aawaz par raqs karta hua

main iqrar ki sarhadon se pare aa gaya hun

ab mujh se milna hai tum ko

to aao milo

magar yaad rakhna

main iqrar ki dushmani par utar aaya hun

ab main inkar ki sarhadon pe milunga