intisab

hamārī chāhatoñ kī buz-dilī thī

varna kyā hotā

agar ye shauq ke mazmūñ

vafā ke ahd-nāme

aur diloñ ke marsiye

ik dūsre ke naam kar dete

ziyāda se ziyāda

chāhateñ bad-nām ho jātīñ

hamārī dostī kī dāstāneñ aam ho jātīñ

to kyā hotā

ye ham jo ziist ke har ishq meñ sachchā.iyāñ socheñ

ye ham jin kā asāsa tishnagi,i tanhā.iyāñ socheñ

ye tahrīreñ

hamārī ārzū-mandī kī tahrīreñ

baham paiavastagī aur ḳhvāb paivandagī kī tahrīreñ

firāq o vasl o mahrūmī o ḳhursandī kī tahrīreñ

ham in par munfa.il kyuuñ huuñ

ye tahrīreñ

agar ik dūsre ke naam ho jaa.eñ

to kyā is se hamāre fan ke rasiyā

sher ke maddāh

ham par tohmateñ dharte

hamārī hamdamī par tanz karte

aur ye bāteñ

aur ye afvāheñ

kisī piilī nigārish meñ

hamesha ke liye marqūm hū jātīñ

hamārī hastiyāñ mazmūm ho jātīñ

nahīñ aisā na hotā

aur agar bil-farz hotā bhī

to phir ham kyā

subuk-sārān-e-shahr-e-harf kī chāloñ se Darte haiñ

sagān-e-kūcha-e-shohrat ke ġhauġhā

kaale bāzāroñ ke dallāloñ se Darte haiñ

hamāre harf jazboñ kī tarah

sachche haiñ, pākīza haiñ, zinda haiñ

balā se ham agar maslūb ho jaate

ye saudā kyā burā thā

gar hamārī qabr ke katbe

tumhāre aur hamāre naam se mansūb ho jāte!

hamari chahaton ki buz-dili thi

warna kya hota

agar ye shauq ke mazmun

wafa ke ahd-name

aur dilon ke marsiye

ek dusre ke nam kar dete

ziyaada se ziyaada

chahaten bad-nam ho jatin

hamari dosti ki dastanen aam ho jatin

to kya hota

ye hum jo zist ke har ishq mein sachchaiyan sochen

ye hum jin ka asasa tishnagi,i tanhaiyan sochen

ye tahriren

hamari aarzu-mandi ki tahriren

baham paiawastagi aur KHwab paiwandagi ki tahriren

firaq o wasl o mahrumi o KHursandi ki tahriren

hum in par munfail kyun hun

ye tahriren

agar ek dusre ke nam ho jaen

to kya is se hamare fan ke rasiya

sher ke maddah

hum par tohmaten dharte

hamari hamdami par tanz karte

aur ye baaten

aur ye afwahen

kisi pili nigarish mein

hamesha ke liye marqum hu jatin

hamari hastiyan mazmum ho jatin

nahin aisa na hota

aur agar bil-farz hota bhi

to phir hum kya

subuk-saran-e-shahr-e-harf ki chaalon se Darte hain

sagan-e-kucha-e-shohrat ke ghaugha

kale bazaron ke dallalon se Darte hain

hamare harf jazbon ki tarah

sachche hain, pakiza hain, zinda hain

bala se hum agar maslub ho jate

ye sauda kya bura tha

gar hamari qabr ke katbe

tumhaare aur hamare nam se mansub ho jate!