ishq

ishq mahdūd nahīñ qissa-o-afsāna tak

ishq mahdūd nahīñ jalva-e-jānāna tak

ishq nazzāra-o-dīdār se aage kī hai baat

ishq chashm-o-lab-o-ruḳhsār se aage kī hai baat

ishq bām-o-dar-o-dīvār se aage kī hai baat

ishq āgāhī-o-irfān kī āyāt kā naam

ishq idrāk-o-tadabbur ke kamālāt kā naam

ishq ehsās kā ma.asūmī-e-jazbāt kā naam

ishq tārīḳh meñ sadiyoñ kī rivāyāt kā naam

phuul se aa.ine se sañg se ho saktā hai ishq

sub.h ke khilte hue rang se ho saktā hai ishq

ishq allāh se asnām se ho saktā hai

ishq dil-soz-o-dil-ārām se ho saktā hai

ishq sañvlātī huī raat se ho saktā hai

ishq bhīgī huī barsāt se ho saktā hai

ishq kul arz-o-samāvāt se ho saktā hai

aur kul arz-o-samāvāt se aage bhī hai ishq

ishq ma.alūm nahīñ kis ko kahāñ tak le jaa.e

ishq hai rāhbar-e-nafs jahāñ tak le jaa.e

ishq mahdud nahin qissa-o-afsana tak

ishq mahdud nahin jalwa-e-jaanana tak

ishq nazzara-o-didar se aage ki hai baat

ishq chashm-o-lab-o-ruKHsar se aage ki hai baat

ishq baam-o-dar-o-diwar se aage ki hai baat

ishq aagahi-o-irfan ki aayat ka nam

ishq idrak-o-tadabbur ke kamalat ka nam

ishq ehsas ka masumi-e-jazbaat ka nam

ishq tariKH mein sadiyon ki riwayat ka nam

phul se aaine se sang se ho sakta hai ishq

subh ke khilte hue rang se ho sakta hai ishq

ishq allah se asnam se ho sakta hai

ishq dil-soz-o-dil-aram se ho sakta hai

ishq sanwlati hui raat se ho sakta hai

ishq bhigi hui barsat se ho sakta hai

ishq kul arz-o-samawat se ho sakta hai

aur kul arz-o-samawat se aage bhi hai ishq

ishq malum nahin kis ko kahan tak le jae

ishq hai rahbar-e-nafs jahan tak le jae