ism-e-ab

jo tū tasvīr kartā hai

jo maiñ tahrīr kartā huuñ

na terā hai na merā hai

magar apnā hai ye jab tak

ise paḌhne meñ kitnī der lagtī hai

abhī māhaul ko chāroñ taraf se

habs ke sahrā ne gherā hai

magar kab tak

havā chalne meñ kitnī der lagtī hai

koī zanjīr hai shāyad hamāre paañv meñ

aur raah meñ kaafī añdherā hai

magar kab tak

diyā jalne meñ kitnī der lagtī hai

havā.eñ bādbānoñ se ulajhtī aur kahīñ nāqa-savāroñ ko

koī paiġhām detī shaam ke āñchal ko thāme

sāhiloñ kī samt aatī haiñ

parinde dā.eroñ meñ uḌte phirte

abr kī chādar meñ lipTe

rang barsāte

fazāoñ meñ safar kī dāstāñ likhte

Thikānoñ kī taraf jaate hue

manzar ko apne aks meñ tabdīl karte haiñ

achānak sar-phirī maujeñ

mujhe chhū kar guzar jaatī haiñ

aur maiñ apne talvoñ se nikaltī sansanātī riit kī sargoshiyāñ

mahsūs kartā huuñ

vahī maiñ huuñ vahī asbāb-e-vahshat haiñ vahī sāhil

vahī tū hai vahī hañstī huī āñkheñ

tirī āñkhoñ meñ rangoñ aur ḳhvāboñ ke jazīre

jagmagāte haiñ

sar-e-mizhgāñ rupahlī sā.atoñ ke isti.āre muskurāte haiñ

hañsī mahtāb bantī hai

phir is mahtāb ke chāroñ taraf āvāz kā haala ubhartā hai

aur is haale meñ terī uñgliyāñ

nādīda manzar ko tilism-e-ḳhvāb se āzād kartī haiñ

tire hāthoñ kī jumbish

dhuup chhāñv se dhanak tartīb de kar

ḳhālī tasvīroñ meñ ḳhadd-o-ḳhāl ko ābād kartī hai

tirī palkeñ jhapaktī haiñ

sitāre se sitāra aan miltā hai

ki jaise shaam hote hī

subuk āsār lahroñ meñ

kināre se kināra aan miltā hai

ye jo kuchh hai

bahut hī ḳhūbsūrat hai

magar us ke liye hai

jo ye sab mahsūs kartā hai

tujhe mālūm bhī ho jaa.e to kyā farq paḌtā hai

abhī din kā thakā haarā musāfir dhuup ke ḳheme sameTe

duur paanī meñ utarne ke liye

be-tāb hai dekho

ye niilā āsmāñ

apnī garāñ ḳhvābī meñ ḳhud ġharqāb hai dekho

na jaane kyoñ

samundar dekhne vāloñ ko

sūraj Dūbne kā ḳhauf rahtā hai

koī hai jis ko ism-e-āb aatā ho

kināroñ kī tarah har lamha kaT girtā ho

zer-e-āb aatā ho

samundar āsmāñ kī rāhdārī hai

magar is rāhdārī tak pahuñchne kā koī rasta

baḌī mushkil se miltā hai

ye ism-e-āb

sāhil par khaḌe nazzāra۔bīnoñ kī samajh meñ kis tarah aa.e

ki ye to Dūbne vāloñ pe bhī

mushkil se khultā hai

magar kab tak

ise khulne meñ kitnī der lagtī hai

jo tu taswir karta hai

jo main tahrir karta hun

na tera hai na mera hai

magar apna hai ye jab tak

ise paDhne mein kitni der lagti hai

abhi mahaul ko chaaron taraf se

habs ke sahra ne ghera hai

magar kab tak

hawa chalne mein kitni der lagti hai

koi zanjir hai shayad hamare panw mein

aur rah mein kafi andhera hai

magar kab tak

diya jalne mein kitni der lagti hai

hawaen baadbanon se ulajhti aur kahin naqa-sawaron ko

koi paigham deti sham ke aanchal ko thame

sahilon ki samt aati hain

parinde daeron mein uDte phirte

abr ki chadar mein lipTe

rang barsate

fazaon mein safar ki dastan likhte

Thikanon ki taraf jate hue

manzar ko apne aks mein tabdil karte hain

achanak sar-phiri maujen

mujhe chhu kar guzar jati hain

aur main apne talwon se nikalti sansanati rit ki sargoshiyan

mahsus karta hun

wahi main hun wahi asbab-e-wahshat hain wahi sahil

wahi tu hai wahi hansti hui aankhen

teri aankhon mein rangon aur KHwabon ke jazire

jagmagate hain

sar-e-mizhgan rupahli saaton ke istiare muskuraate hain

hansi mahtab banti hai

phir is mahtab ke chaaron taraf aawaz ka haala ubharta hai

aur is haale mein teri ungliyan

nadida manzar ko tilism-e-KHwab se aazad karti hain

tere hathon ki jumbish

dhup chhanw se dhanak tartib de kar

KHali taswiron mein KHadd-o-KHal ko aabaad karti hai

teri palken jhapakti hain

sitare se sitara aan milta hai

ki jaise sham hote hi

subuk aasar lahron mein

kinare se kinara aan milta hai

ye jo kuchh hai

bahut hi KHubsurat hai

magar us ke liye hai

jo ye sab mahsus karta hai

tujhe malum bhi ho jae to kya farq paDta hai

abhi din ka thaka haara musafir dhup ke KHeme sameTe

dur pani mein utarne ke liye

be-tab hai dekho

ye nila aasman

apni garan KHwabi mein KHud gharqab hai dekho

na jaane kyon

samundar dekhne walon ko

suraj Dubne ka KHauf rahta hai

koi hai jis ko ism-e-ab aata ho

kinaron ki tarah har lamha kaT girta ho

zer-e-ab aata ho

samundar aasman ki rahdari hai

magar is rahdari tak pahunchne ka koi rasta

baDi mushkil se milta hai

ye ism-e-ab

sahil par khaDe nazzara۔binon ki samajh mein kis tarah aae

ki ye to Dubne walon pe bhi

mushkil se khulta hai

magar kab tak

ise khulne mein kitni der lagti hai