istifsar

vo kyā jāneñ kyoñ māh-pāroñ se pūchho

mohabbat hai kyā ġham ke māroñ se pūchho

lahū be ḳhatāoñ kā kitnā bahā hai

ye jā kar zarā lāla-zāroñ se pūchho

agar pūchhnā haiñ ḳhizāñ ke mazālim

gulistāñ kī guzrī bahāroñ se pūchho

kahāñ pahūñchā hai kārvāñ zindagī kā

ye jā kar shikasta mazāroñ se pūchho

vafā ke liye kitnā roī hai duniyā

taḌapte hue ābshāroñ se pūchho

rah-e-ishq meñ vasl hogā kahāñ par

ye dariyā ke donoñ kināroñ se pūchho

hai bīmār-e-furqat kā kyā ab sahārā

ye jaate hue chāñd-tāroñ se pūchho

sukūñ dil ko miltā hai furqat meñ kaise

shab-e-hijr ke be-qarāroñ se pūchho

diyā kyā hai bād-e-bahārī ne tohfa

ye jaib-o-garebāñ ke tāroñ se pūchho

sadā saath un ke guzārī haiñ rāteñ

mirā haal tum chāñd-tāroñ se pūchho

pata pūchhnā hai agar 'ja.afarī' kā

to dasht-e-muġhīlāñ ke ḳhāroñ se pūchho

wo kya jaanen kyon mah-paron se puchho

mohabbat hai kya gham ke maron se puchho

lahu be KHataon ka kitna baha hai

ye ja kar zara lala-zaron se puchho

agar puchhna hain KHizan ke mazalim

gulistan ki guzri bahaaron se puchho

kahan pahuncha hai karwan zindagi ka

ye ja kar shikasta mazaron se puchho

wafa ke liye kitna roi hai duniya

taDapte hue aabshaaron se puchho

rah-e-ishq mein wasl hoga kahan par

ye dariya ke donon kinaron se puchho

hai bimar-e-furqat ka kya ab sahaara

ye jate hue chand-taron se puchho

sukun dil ko milta hai furqat mein kaise

shab-e-hijr ke be-qararon se puchho

diya kya hai baad-e-bahaari ne tohfa

ye jaib-o-gareban ke taron se puchho

sada sath un ke guzari hain raaten

mera haal tum chand-taron se puchho

pata puchhna hai agar 'jafari' ka

to dasht-e-mughilan ke KHaron se puchho