izhaar

ham ne sochā ab shikasta ghar muqaffal nahīñ ho sakte

kivāḌoñ ke baġhair

achchhe kivāḌ achchhī imārat ke baġhair

ham ne kuchh kaalī tijārat se kamā.ī kī

udhar kuchh jangaloñ ke chor apne yaar the

lakḌī ḳharīdī aur kivāḌoñ aur kaḌiyoñ meñ ghaḌī

naqshe banā.e aur dīvāreñ chunīñ ham ne chhateñ Dālīñ

na.ī ta.amīr ko har rang kī har art kī dhaj dī

phir apnī soch aur ehsās kī rā.anā nazar-afroz

tasvīroñ se kamroñ ko sajā kar aa.ine ke sāmne aa.e

aur ik fankār kī naḳhvat se bāloñ ko bikherā

aur chehre ko banāvaT dī

yahī chehra hamāre saath cigarette phūñktā

saḌkoñ pe phirtā hoTeloñ meñ chaa.e piitā thā

zamāne bhar kī gappeñ hāñktā thā

lekin us sach kī sadā us meñ muqaffal thī jo us ke ahd kā sach thā

vo gūñgā thā

kivāḌoñ kī tarah apne makāñ meñ apnī tasvīr kī sūrat ham muqaffal the

aur ab jab shahr meñ baḌhte dhamākoñ ne

makāñ larzā diyā hai toḌ Daale haiñ kivāḌ aur masḳh kar Daalī haiñ tasvīreñ

hameñ ye dukh hai ham ḳhud meñ muqaffal kyoñ hue the

jabr kī baḌhtī huī mī.ād meñ

sabr kī shafqat bharī būḌhī duā.eñ kyoñ nahīñ

ham ne ḳhud par kyoñ ḳhalā ke fāsle lambe kiye

sach kī ḳhāmoshī ke mujrim kyoñ bane

chup gavāra kyoñ huī

baat gūñge kā ishāra kyoñ huī

ham agar lab kholte

kuchh dūsre bhī bolte

kuchh dūsre bhī bolte

hum ne socha ab shikasta ghar muqaffal nahin ho sakte

kiwaDon ke baghair

achchhe kiwaD achchhi imarat ke baghair

hum ne kuchh kali tijarat se kamai ki

udhar kuchh jangalon ke chor apne yar the

lakDi KHaridi aur kiwaDon aur kaDiyon mein ghaDi

naqshe banae aur diwaren chunin hum ne chhaten Dalin

nai tamir ko har rang ki har art ki dhaj di

phir apni soch aur ehsas ki raana nazar-afroz

taswiron se kamron ko saja kar aaine ke samne aae

aur ek fankar ki naKHwat se baalon ko bikhera

aur chehre ko banawaT di

yahi chehra hamare sath cigarette phunkta

saDkon pe phirta hoTelon mein chae pita tha

zamane bhar ki gappen hankta tha

lekin us sach ki sada us mein muqaffal thi jo us ke ahd ka sach tha

wo gunga tha

kiwaDon ki tarah apne makan mein apni taswir ki surat hum muqaffal the

aur ab jab shahr mein baDhte dhamakon ne

makan larza diya hai toD Dale hain kiwaD aur masKH kar Dali hain taswiren

hamein ye dukh hai hum KHud mein muqaffal kyon hue the

jabr ki baDhti hui miad mein

sabr ki shafqat bhari buDhi duaen kyon nahin

hum ne KHud par kyon KHala ke fasle lambe kiye

sach ki KHamoshi ke mujrim kyon bane

chup gawara kyon hui

baat gunge ka ishaara kyon hui

hum agar lab kholte

kuchh dusre bhi bolte

kuchh dusre bhi bolte