iztirab-e-intizar

shām-e-alam-numā hai shab hai sukūt-afzā

oḌhe hue hai goyā chādar siyāh duniyā

ik sham.a muzmahil hai ḳhāmosh aur tanhā

har har nafas se jis ke paidā hai ek sho.ala

hājat nahīñ hai mujh ko ab aisī zindagī kī

ai nā-shanās-e-ulfat kuchh had bhī bekasī kī

merā dil-e-hazīñ hai vīrāna-e-tamannā

ābād thā kabhī ye kāshāna-e-tamanna

kab tak rahūñ maiñ āḳhir dil-resh-o-dil-shikasta

āñkhoñ meñ phir rahā hai apnā vo pahlā naqsha

ābād jab makāñ thā masrūr ye makīñ thā

ya.anī ki dil na merā āvāra-o-hazīñ thā

qismat bigaḌ ga.ī hai kyūñkar ise banā.ūñ

is dāstān-e-ġham ko apnī kise sunā.ūñ

tum kyā phire ki goyā duniyā phirī huī hai

ranj-o-alam se har shai yaksar ghirī huī hai

rah-rah ke mere dil meñ ab dard uTh rahā hai

yās-o-alam kā naqsha goyā khiñchā huā hai

jo shai hai is jahāñ meñ tārīk hai nazar meñ

ik dard sā hai dil meñ ik Tiis hai jigar meñ

har lamha zindagī kā vaqf-e-tapish hai merā

ye marg-e-bekasī hai yā intizār terā

sham-e-alam-numa hai shab hai sukut-afza

oDhe hue hai goya chadar siyah duniya

ek shama muzmahil hai KHamosh aur tanha

har har nafas se jis ke paida hai ek shoala

hajat nahin hai mujh ko ab aisi zindagi ki

ai na-shanas-e-ulfat kuchh had bhi bekasi ki

mera dil-e-hazin hai virana-e-tamanna

aabaad tha kabhi ye kashana-e-tamanna

kab tak rahun main aaKHir dil-resh-o-dil-shikasta

aankhon mein phir raha hai apna wo pahla naqsha

aabaad jab makan tha masrur ye makin tha

yani ki dil na mera aawara-o-hazin tha

qismat bigaD gai hai kyunkar ise banaun

is dastan-e-gham ko apni kise sunaun

tum kya phire ki goya duniya phiri hui hai

ranj-o-alam se har shai yaksar ghiri hui hai

rah-rah ke mere dil mein ab dard uTh raha hai

yas-o-alam ka naqsha goya khincha hua hai

jo shai hai is jahan mein tarik hai nazar mein

ek dard sa hai dil mein ek Tis hai jigar mein

har lamha zindagi ka waqf-e-tapish hai mera

ye marg-e-bekasi hai ya intizar tera