jaan-ba-haq lafzon ka janaza

hamāre jism hangeroñ par

ma.e sales-taxes laTke hue haiñ

hamāre siyānoñ ne virāsat meñ hameñ

news anchor diye haiñ

jo hameñ koī bhī ḳhush-ḳhabarī na sunāne kī tanḳhvāh lete haiñ

aur ham rozāna shab nau baje

un kā āshīrvād le kar

bistaraoñ meñ dubak jaate haiñ

sunā hai hamārā janam puure chāñd kī raat ko huā thā

jo amāvas kī tarah siyāh thī

us raat hamārī āñkheñ scrēn par chipkā dī ga.iiñ

aur zabān remote ke buttonoñ ke biich dabā dī ga.ī

ham likhnā jānte the

ham ne apnī ungliyāñ qalam banā diiñ

aur tahrīr ko zabān de dī

lekin ek shaam breaking-news se patā chalā

ki tamām lafz ijtimā.ī ḳhud-kushī kar chuke haiñ

hamare jism hangeron par

mae sales-taxes laTke hue hain

hamare siyanon ne wirasat mein hamein

news anchor diye hain

jo hamein koi bhi KHush-KHabari na sunane ki tanKHwah lete hain

aur hum rozana shab nau baje

un ka aashirwad le kar

bistaraon mein dubak jate hain

suna hai hamara janam pure chand ki raat ko hua tha

jo amawas ki tarah siyah thi

us raat hamari aankhen screen par chipka di gain

aur zaban remote ke buttonon ke bich daba di gai

hum likhna jaante the

hum ne apni ungliyan qalam bana din

aur tahrir ko zaban de di

lekin ek sham breaking-news se pata chala

ki tamam lafz ijtimai KHud-kushi kar chuke hain