jab aankh khuli meri

sūraj kā zirah-baktar

chamkā to maiñ ghabrāyā

TuuTī huī khiḌkī se

lahrātā huā neza

kauñde kī tarah aayā

maiñ dard se chillāyā

hoñToñ ne paḌhe mantar

sīmāb sī poroñ ne

ik poTlī abrak kī

chhiḌkī mire chehre par

aur kirnoñ kā ik chhīñTā

maarā mirī āñkhoñ par

āñkheñ mirī chuñdhyā.īñ

kuchh bhī na nazar aayā

jab aañkh khulī merī

dekhā ki har ik jānib

zartār sī kirnoñ kā

ik zard samundar thā

aur zard samundar meñ

chāñdī kī pahāḌī par

maiñ peḌ thā sone kā

shāḳhoñ meñ mirī har sū

jhankār thī pattoñ kī

uḌtī huī chiḌiyoñ kī

yā aag kī Daliyoñ kī

ik Daar sī aa.ī thī

aur mujh meñ samā.ī thī

qadmoñ ke tale mere

zanjīr thī lamhoñ kī

mere zirah-baktar se

jo kauñdā lapaktā thā

tāroñ ke jharokoñ tak

pal bhar meñ pahuñchtā thā

maiñ jism ke marqad se

bāhar bhī thā andar bhī

maiñ ḳhud hī pahāḌī thā

aur ḳhud hī samundar bhī

suraj ka zirah-baktar

chamka to main ghabraya

TuTi hui khiDki se

lahraata hua neza

kaunde ki tarah aaya

main dard se chillaya

honTon ne paDhe mantar

simab si poron ne

ek poTli abrak ki

chhiDki mere chehre par

aur kirnon ka ek chhinTa

mara meri aankhon par

aankhen meri chundhyain

kuchh bhi na nazar aaya

jab aankh khuli meri

dekha ki har ek jaanib

zartar si kirnon ka

ek zard samundar tha

aur zard samundar mein

chandi ki pahaDi par

main peD tha sone ka

shaKHon mein meri har su

jhankar thi patton ki

uDti hui chiDiyon ki

ya aag ki Daliyon ki

ek Dar si aai thi

aur mujh mein samai thi

qadmon ke tale mere

zanjir thi lamhon ki

mere zirah-baktar se

jo kaunda lapakta tha

taron ke jharokon tak

pal bhar mein pahunchta tha

main jism ke marqad se

bahar bhi tha andar bhi

main KHud hi pahaDi tha

aur KHud hi samundar bhi