jalti raat sulagte sae

qatra qatra Tapak rahā hai lahū

lamha lamha pighal rahī hai hayāt

mere zaanū pe rakh ke sar apnā

ro rahī hai udaas tanhā.ī

kitnā gahrā hai dard kā rishta

kitnā taaza hai zaḳhm-e-rusvā.ī

hasratoñ ke darīda dāman meñ

jaane kab se chhupā.e baiThā huuñ

dil kī mahrūmiyoñ kā sarmāya

TūTe-phūTe sharāb ke sāġhar

mom-battī ke adh-jale TukḌe

kuchh tarāshe shikasta nazmoñ ke

uljhī uljhī udaas tahrīreñ

gard-ālūd chand tasvīreñ

mere kamre meñ aur kuchh bhī nahīñ

mere kamre meñ aur kuchh bhī nahīñ

vaqt kā jhurriyoñ bharā chehra

kāñptā hai mirī nigāhoñ meñ

kho ga.ī hai murād kī manzil

ġham kī zulmat-farosh rāhoñ meñ

mere ghar kī purānī dīvāreñ

har ghaḌī dekhtī haiñ ḳhvāb na.e

par mirī ruuh ke ḳharābe meñ

kaun aa.egā itnī raat ga.e

zindagī mehrbāñ nahīñ to phir

maut kyuuñ dard-āshnā hogī

khaTkhaTāyā hai kis ne darvāza

dekhnā sar-phirī havā hogī

qatra qatra Tapak raha hai lahu

lamha lamha pighal rahi hai hayat

mere zanu pe rakh ke sar apna

ro rahi hai udas tanhai

kitna gahra hai dard ka rishta

kitna taza hai zaKHm-e-ruswai

hasraton ke darida daman mein

jaane kab se chhupae baiTha hun

dil ki mahrumiyon ka sarmaya

TuTe-phuTe sharab ke saghar

mom-batti ke adh-jale TukDe

kuchh tarashe shikasta nazmon ke

uljhi uljhi udas tahriren

gard-alud chand taswiren

mere kamre mein aur kuchh bhi nahin

mere kamre mein aur kuchh bhi nahin

waqt ka jhurriyon bhara chehra

kanpta hai meri nigahon mein

kho gai hai murad ki manzil

gham ki zulmat-farosh rahon mein

mere ghar ki purani diwaren

har ghaDi dekhti hain KHwab nae

par meri ruh ke KHarabe mein

kaun aaega itni raat gae

zindagi mehrban nahin to phir

maut kyun dard-ashna hogi

khaTkhaTaya hai kis ne darwaza

dekhna sar-phiri hawa hogi