jangali nach

jañgalī libās meñ ek paikar-e-gudāz

chal rahā hai jhāḌiyoñ meñ saañp jhuum jhuum kar

uḌ rahā hai mor apne baal chuum chuum kar

jhiil māñgne lagī shaam kī havā se saaz

ek baar tiin baar

dast-e-sandalī uThe

paañv lahar khā ga.e

jism-e-nāz ke sharār

jhiil ke kināre mast ho ke nāchne lage

jañgalī javān shaam ko sukūn pā ga.e

jhoñpaḌoñ se apne apne saaz le ke aa ga.e

āsmāñ se chāñd aur sitāre jhāñkne lage

chāñdnī meñ jaag uThī

so rahī thī sub.h se

bol kaise ḳhvāb the?

mere ''budh'' kī mūrtī

jhāḌiyoñ se surḳh zard phuul toḌ toḌ kar

ek baar tiin baar aur ab to bār-bār

mūrtī pe jañgalī hasīna kartī hai nisār

chashm o lab ke raqs par haath moḌ moḌ kar

raqs kī sharāb meñ

mor mast ho gayā

saañp jaise so gayā

aks-e-māhtāb meñ

ek paikar-e-gudāz aur nāchne lagā

Dholakoñ kī mast chīḳh aur tez ho ga.ī

jañgalī hasīna aur sho.ala-rez ho ga.ī

mūrtī kā devtā ḳhud hī muskurā uThā

aur jaise chauñk kar

raqs band ho gayā

kis qadar ġhurūr thā

kāmyāb raqs par

jangali libas mein ek paikar-e-gudaz

chal raha hai jhaDiyon mein sanp jhum jhum kar

uD raha hai mor apne baal chum chum kar

jhil mangne lagi sham ki hawa se saz

ek bar tin bar

dast-e-sandali uThe

panw lahar kha gae

jism-e-naz ke sharar

jhil ke kinare mast ho ke nachne lage

jangali jawan sham ko sukun pa gae

jhonpaDon se apne apne saz le ke aa gae

aasman se chand aur sitare jhankne lage

chandni mein jag uThi

so rahi thi subh se

bol kaise KHwab the?

mere budh ki murti

jhaDiyon se surKH zard phul toD toD kar

ek bar tin bar aur ab to bar-bar

murti pe jangali hasina karti hai nisar

chashm o lab ke raqs par hath moD moD kar

raqs ki sharab mein

mor mast ho gaya

sanp jaise so gaya

aks-e-mahtab mein

ek paikar-e-gudaz aur nachne laga

Dholakon ki mast chiKH aur tez ho gai

jangali hasina aur shoala-rez ho gai

murti ka dewta KHud hi muskura uTha

aur jaise chaunk kar

raqs band ho gaya

kis qadar ghurur tha

kaamyab raqs par