jangalon ki hawa

vaqt-e-ruḳhsat udaas aur maġhmūm āvāz meñ

us ne mujh se kahā thā

tumheñ ḳhūbsūrat hasīñ dostoñ kī

rifāqat mayassar hai maiñ kaun huuñ

merī qurbat kī har aarzū

sirf jazb-e-pareshāñ hai ik roz āḳhir mujhe bhuul jāoge tum

mujhe yaad karnā bhī chāhoge shāyad magar kar na pāoge tum

kal kī lagtī hai barsoñ purānī ye be-nām sī dāstāñ

mujhe ḳhūbsūrat hasīñ dostoñ kī

rifāqat mayassar hai maiñ roz-o-shab

chachahātā huuñ bātoñ ke jangal ugātā huuñ jin meñ mujhe

mere dushman mire ḳhuuñ ke pyāse ka.ī jangalī jānvar DhūñDte haiñ

jū-e-yād-e-hasīñ kī ravānī meñ koī sulagtā huā aks hai

vo mujhe apnī jānib

ishāroñ se aksar bulātā hai

mānūs hai garche lekin mirā kaun hai

aaj tahlīl hotā huuñ aks-e-ravāñ meñ

tire jism meñ

jangaloñ kī havā

chīḳhtī hai musalsal mire jism meñ

waqt-e-ruKHsat udas aur maghmum aawaz mein

us ne mujh se kaha tha

tumhein KHubsurat hasin doston ki

rifaqat mayassar hai main kaun hun

meri qurbat ki har aarzu

sirf jazb-e-pareshan hai ek roz aaKHir mujhe bhul jaoge tum

mujhe yaad karna bhi chahoge shayad magar kar na paoge tum

kal ki lagti hai barson purani ye be-nam si dastan

mujhe KHubsurat hasin doston ki

rifaqat mayassar hai main roz-o-shab

chachahata hun baaton ke jangal ugata hun jin mein mujhe

mere dushman mere KHun ke pyase kai jangali jaanwar DhunDte hain

ju-e-yaad-e-hasin ki rawani mein koi sulagta hua aks hai

wo mujhe apni jaanib

ishaaron se aksar bulata hai

manus hai garche lekin mera kaun hai

aaj tahlil hota hun aks-e-rawan mein

tere jism mein

jangalon ki hawa

chiKHti hai musalsal mere jism mein