jazbaat nafsiyat se baala-tar hain

yādoñ ke hisār meñ jakḌe vajūd pe

shab ne āḳhirī dastak dī

aañkh ke sātveñ parde pe ik aks

musalsal tair rahā hai

jis ke baa.is

niiñd ko izn-e-hāzirī nahīñ milā

hamārī bātoñ ke saare sur sunñe vaalā

niim kā daraḳht

aur añgūThī meñ jaḌā aqiiq

ek jaise haiñ

dil pe iztirārī kaifiyat taarī hai

dimāġh tavīl masāfat kī jānib gāmzan hai

be-ḳhayālī meñ

ham saarā din ik dūsre ke

nāmoñ meñ sabz rang bharte haiñ

is surḳh dā.ere meñ

chhupe raaz ko jānñe pe kaam jaarī hai

Dhaltī shaam ke saa.e se mere ufuq

siyāh hone lage

jazboñ kī sadāqat kā dā.era

jab mukammal huā to

lams kā rang banñe lagā

mirī zaat ke madār meñ ik naam kā raqs jaarī hai

siyāh gulāb ke jazbāt kī akkāsī

ilm-e-nafsiyāt se bālā-tar hai

yaadon ke hisar mein jakDe wajud pe

shab ne aaKHiri dastak di

aankh ke satwen parde pe ek aks

musalsal tair raha hai

jis ke bais

nind ko izn-e-haziri nahin mila

hamari baaton ke sare sur sunne wala

nim ka daraKHt

aur anguThi mein jaDa aqiq

ek jaise hain

dil pe iztirari kaifiyat tari hai

dimagh tawil masafat ki jaanib gamzan hai

be-KHayali mein

hum sara din ek dusre ke

namon mein sabz rang bharte hain

is surKH daere mein

chhupe raaz ko jaanne pe kaam jari hai

Dhalti sham ke sae se mere ufuq

siyah hone lage

jazbon ki sadaqat ka daera

jab mukammal hua to

lams ka rang banne laga

meri zat ke madar mein ek nam ka raqs jari hai

siyah gulab ke jazbaat ki akkasi

ilm-e-nafsiyat se baala-tar hai