jhuT ka natija

ahmad bablū baabū salmā

ek jamā.at ke ye bachche

aḳhlāqī ghanTe meñ dekho

jam.a hue haiñ ik ik kar ke

nazm-o-zabt jamā.at meñ thā

uf nahīñ kartā thā koī bachcha

ye jo kahānī kā thā ghanTa

sab ko shauq kahānī kā thā

dekho class meñ ustād aa.e

uTh ke khaḌe hue saare bachche

sab ne kiyā salām ab un ko

bachche the sab man ke achchhe

ham āvāz thā har ik bachcha

ham haiñ kahānī ke sab shaidā

sab ne mil kar kiyā taqāzā

ham ko sunā.iye achchhā qissa

sun kar bachchoñ se ye bāteñ

ho ga.e ḳhush ustād usī dam

munnū chunnū mannū ḳhush the

qābil-e-dīd hai shauq kā aalam

teacher ne jo chheḌī kahānī

bachche hama-tan gosh hue sab

ḳhāmoshī thī har chehre par

sab se kahā ye teacher ne ab

ek pahāḌī ke dāman meñ

qarya ik shādāb thā bachcho

gaañv meñ ik charvāhā bhī thā

haañ vo bahut nādān thā pyāro

roz pahāḌī par vo jaatā

bakriyāñ apnī ḳhud hī charātā

din bhar hāñktā vo gale ko

shaam Dhale ghar vāpas aatā

ik din us ko sūjhī sharārat

rah rah kar us ne chillāyā

logo aao mujh ko bachāo

sher ne bolā hai ab dhāvā

laTThe bhāle barchhiyāñ le kar

bhāge aa.e log barābar

paayā salāmat charvāhe ko

kahne lagā charvāhā hañs kar

sher yahāñ aayā nahīñ koī

yuuñ hī sharārat maiñ ne kī thī

shukriya aap yahāñ sab aa.e

aap kī hamdardī hai sachchī

maiñ ne sab ko yuuñ hī parkhā

imtihāñ aap kī chāhat kā thā

ḳhush huuñ aap kī hamdardī par

maiñ ne pyaar sabhoñ kā paayā

thā ye kartab charvāhe kā

us ne ullū sab ko banāyā

māyūsī ke saath vo lauTe

jhūTā charvāhe ko paayā

izzat charvāhe ne gañvā.ī

ab ke muñh kī us ne khaa.ī

charvāhe kī nādānī par

dī qarye vāloñ ne dahā.ī

hariyālī kā mausam aayā

ġhalle ne bhī chārā paayā

thā masrūr bahut charvāhā

us ne ḳhushī kā naġhma gaayā

us ne ab manzar ye dekhā

sher hai ġhalle meñ aa dhamkā

ghabrā kar phir vo chillāyā

dekho sher ne kar diyā hamla

gaañv meñ chīḳheñ sunīñ logoñ ne

ek mazāq use sab samjhe

aayā na koī us kī madad ko

paḌ ga.e jaan ke laale dekho

sher kā ban gayā bachcho nivāla

charvāhe kā saarā gila

phir charvāhe par huā jo hamla

ḳhātma ho gayā charvāhe kā

shab kā huā gahrā sannāTā

charvāhā ab ghar nahīñ aayā

us kī maañ bahneñ thiiñ pareshāñ

baḌh gayā un par ḳhauf kā saaya

dūsre din kā sūraj niklā

gaañv meñ charvāhe kā thā charchā

sab ne pahāḌī par jā dekhā

ġham thā patā ab charvāhe kā

qissa ḳhatm huā ye bachcho

tum ho kyuuñ ġhamgīñ ye bolo

charvāhe kī fikr ko chhoḌo

charvāhe se sabaq ye sīkho

jhuuT se jaan ga.ī thī us kī

baat hamesha kahnā sachchī

maano jhuuT balā hai bachcho

us se hamesha bach kar rahiyo

jhuuT se jaan bhī jā saktī hai

jhuuT to ik andhī shaktī hai

jhuuT gunāh hai jaano bachcho

dozaḳh miltī hai jhūToñ ko pyāro

chhoḌo sharārat saarī chhoḌo

sachchā.ī ko bas apnāo

ahmad bablu babu salma

ek jamaat ke ye bachche

aKHlaqi ghanTe mein dekho

jama hue hain ek ek kar ke

nazm-o-zabt jamaat mein tha

uf nahin karta tha koi bachcha

ye jo kahani ka tha ghanTa

sab ko shauq kahani ka tha

dekho class mein ustad aae

uTh ke khaDe hue sare bachche

sab ne kiya salam ab un ko

bachche the sab man ke achchhe

hum aawaz tha har ek bachcha

hum hain kahani ke sab shaida

sab ne mil kar kiya taqaza

hum ko sunaiye achchha qissa

sun kar bachchon se ye baaten

ho gae KHush ustad usi dam

munnu chunnu mannu KHush the

qabil-e-did hai shauq ka aalam

teacher ne jo chheDi kahani

bachche hama-tan gosh hue sab

KHamoshi thi har chehre par

sab se kaha ye teacher ne ab

ek pahaDi ke daman mein

qarya ek shadab tha bachcho

ganw mein ek charwaha bhi tha

han wo bahut nadan tha pyaro

roz pahaDi par wo jata

bakriyan apni KHud hi charaata

din bhar hankta wo gale ko

sham Dhale ghar wapas aata

ek din us ko sujhi shararat

rah rah kar us ne chillaya

logo aao mujh ko bachao

sher ne bola hai ab dhawa

laTThe bhaale barchhiyan le kar

bhage aae log barabar

paya salamat charwahe ko

kahne laga charwaha hans kar

sher yahan aaya nahin koi

yun hi shararat main ne ki thi

shukriya aap yahan sab aae

aap ki hamdardi hai sachchi

main ne sab ko yun hi parkha

imtihan aap ki chahat ka tha

KHush hun aap ki hamdardi par

main ne pyar sabhon ka paya

tha ye kartab charwahe ka

us ne ullu sab ko banaya

mayusi ke sath wo lauTe

jhuTa charwahe ko paya

izzat charwahe ne ganwai

ab ke munh ki us ne khai

charwahe ki nadani par

di qarye walon ne dahai

hariyali ka mausam aaya

ghalle ne bhi chaara paya

tha masrur bahut charwaha

us ne KHushi ka naghma gaya

us ne ab manzar ye dekha

sher hai ghalle mein aa dhamka

ghabra kar phir wo chillaya

dekho sher ne kar diya hamla

ganw mein chiKHen sunin logon ne

ek mazaq use sab samjhe

aaya na koi us ki madad ko

paD gae jaan ke lale dekho

sher ka ban gaya bachcho niwala

charwahe ka sara gila

phir charwahe par hua jo hamla

KHatma ho gaya charwahe ka

shab ka hua gahra sannaTa

charwaha ab ghar nahin aaya

us ki man bahnen thin pareshan

baDh gaya un par KHauf ka saya

dusre din ka suraj nikla

ganw mein charwahe ka tha charcha

sab ne pahaDi par ja dekha

gham tha pata ab charwahe ka

qissa KHatm hua ye bachcho

tum ho kyun ghamgin ye bolo

charwahe ki fikr ko chhoDo

charwahe se sabaq ye sikho

jhuT se jaan gai thi us ki

baat hamesha kahna sachchi

mano jhuT bala hai bachcho

us se hamesha bach kar rahiyo

jhuT se jaan bhi ja sakti hai

jhuT to ek andhi shakti hai

jhuT gunah hai jaano bachcho

dozaKH milti hai jhuTon ko pyaro

chhoDo shararat sari chhoDo

sachchai ko bas apnao