jism ke sath aaKHiri lamhe

chalo chhuTTī milī āḳhir

subuk-dosh ho ga.ī maiñ pahre-dārī se

ik aise jism kī

jo itnā nāzuk thā

ki us kī uñgliyāñ phal kāTne vaalā

koī chāqū bhī ghāyal kartā rahtā thā

havā kam ho to jis kī naak se ḳhuuñ bahne lagtā thā

vo jis ke pair thoḌī sī thakan se suuj jaate the

ye mere āḳhirī lamhe haiñ apne jism ke saath

bas ik taḳhta

aur us ke baa'd maiñ āzād huuñ sair-e-falak ko

sukūñ dil meñ liye is baat kā

ki mere jism ko apnī hī maut aa.ī

vo haarā bhī to sirf aur sirf apnī 'umr se

aur ruuh yuuñ bhī

'umr ko gintī nahīñ hai

dushmanoñ meñ jism ke

chalo chhuTTi mili aaKHir

subuk-dosh ho gai main pahre-dari se

ek aise jism ki

jo itna nazuk tha

ki us ki ungliyan phal kaTne wala

koi chaqu bhi ghayal karta rahta tha

hawa kam ho to jis ki nak se KHun bahne lagta tha

wo jis ke pair thoDi si thakan se suj jate the

ye mere aaKHiri lamhe hain apne jism ke sath

bas ek taKHta

aur us ke ba'd main aazad hun sair-e-falak ko

sukun dil mein liye is baat ka

ki mere jism ko apni hi maut aai

wo haara bhi to sirf aur sirf apni 'umr se

aur ruh yun bhi

'umr ko ginti nahin hai

dushmanon mein jism ke