jism ki aag

mire jism meñ aag aisī lagī hai

jise saikḌoñ kyā

hazāroñ samundar bujhāne ko aa.eñ

to bujhne na paa.e

mirī ruuh kī rahguzāroñ pe sho.ale

lapaktī zabānoñ ke kashkol le kar

mire jism se

ḳhuuñ kā ik qatra-e-ārzū māñgte haiñ

magar jism merā to ḳhud ek daryūza-gar hai

jo lamha-ba-lamha

ḳhud apnī lagā.ī huī aag meñ

jal rahā hai

ḳhayāloñ ke saa.e bhī

ik ātish-e-ġhair-mahsūs meñ jal rahe haiñ

koī hai

jo mujh ko najāt is tapish se dilā.e

koī hai

jo mere liye ek aisā samundar batā.e

jo koī bhī jāñ-dār-o-be-jān maḳhlūq ke lams se

āshnā tak nahīñ ho

jo ḳhud apne darpan meñ

shakl apnī hī dekh kar

jī rahā ho

agar tum ko aisā samundar mile to batāo

ki ye ātish-e-ġhair-mahsūs

aise samundar se hī bujh sakegī

kahāñ hai samundar

kahāñ hai samundar

ki maiñ ātish-e-lams kī lazzat-e-ġhair-mahdūd se

ab pighalne lagā huuñ

mere jism mein aag aisi lagi hai

jise saikDon kya

hazaron samundar bujhane ko aaen

to bujhne na pae

meri ruh ki rahguzaron pe shoale

lapakti zabanon ke kashkol le kar

mere jism se

KHun ka ek qatra-e-arzu mangte hain

magar jism mera to KHud ek daryuza-gar hai

jo lamha-ba-lamha

KHud apni lagai hui aag mein

jal raha hai

KHayalon ke sae bhi

ek aatish-e-ghair-mahsus mein jal rahe hain

koi hai

jo mujh ko najat is tapish se dilae

koi hai

jo mere liye ek aisa samundar batae

jo koi bhi jaan-dar-o-be-jaan maKHluq ke lams se

aashna tak nahin ho

jo KHud apne darpan mein

shakl apni hi dekh kar

ji raha ho

agar tum ko aisa samundar mile to batao

ki ye aatish-e-ghair-mahsus

aise samundar se hi bujh sakegi

kahan hai samundar

kahan hai samundar

ki main aatish-e-lams ki lazzat-e-ghair-mahdud se

ab pighalne laga hun