jo pahle thi so ab bhi hai

nadāmat se subuk-sārī jo pahle thī so ab bhī hai

sadāqat se girāñ-bārī jo pahle thī so ab bhī hai

mizājoñ meñ vo makkārī jo pahle thī so ab bhī hai

diloñ ko sach se be-zārī jo pahle thī so ab bhī hai

taḳhayyul meñ ba-zāhir inqalāb aayā to hai lekin

sitam kī garm-bāzārī jo pahle thī so ab bhī hai

samajhte the ki āzādī masarrat le ke aa.egī

ġharībī aur nādārī jo pahle thī so ab bhī hai

nahīñ ab tak hamāre zāhir-o-bātin meñ yak-rangī

numā.ish aur makkārī jo pahle thī so ab bhī hai

farañgī kī asīrī se to āzādī milī lekin

ġhulāmī kī fazā taarī jo pahle thī so ab bhī hai

zamāna kuchh kahe lekin ye ik raushan haqīqat hai

'razī' apnī vaza-dārī jo pahle thī so ab bhī hai

nadamat se subuk-sari jo pahle thi so ab bhi hai

sadaqat se giran-bari jo pahle thi so ab bhi hai

mizajon mein wo makkari jo pahle thi so ab bhi hai

dilon ko sach se be-zari jo pahle thi so ab bhi hai

taKHayyul mein ba-zahir inqalab aaya to hai lekin

sitam ki garm-bazari jo pahle thi so ab bhi hai

samajhte the ki aazadi masarrat le ke aaegi

gharibi aur nadari jo pahle thi so ab bhi hai

nahin ab tak hamare zahir-o-baatin mein yak-rangi

numaish aur makkari jo pahle thi so ab bhi hai

farangi ki asiri se to aazadi mili lekin

ghulami ki faza tari jo pahle thi so ab bhi hai

zamana kuchh kahe lekin ye ek raushan haqiqat hai

'razi' apni waza-dari jo pahle thi so ab bhi hai