jumud

ye shaam shām-e-avadh nahīñ hai jise tumhārī siyāh zulfeñ chhupā sakeñgī

ye sub.h sub.h-e-tarab nahīñ hai

ye ik dhuñdlakā hai ek kohrā

ubharte sūraj kī garm kirnoñ ke ḳhvāb sayyāl ho ga.e haiñ

zamīn apnī ragoñ kī garmī luTā chukī hai

hayāt aañsū bahā rahī hai

har ek barg-o-samar pe motī jhalak rahe haiñ

tum apne āñchal pe bazm-e-parvīñ sajā chukī ho

tum apne anfās ke jilau meñ hazāroñ ġhunche khilā chukī ho

ḳhirām-e-nāzuk kī sāhirī se zamīñ ko jannat banā chukī ho

tum ik tabassum se kitnī sham.eñ jalā chukī ho

magar ye shām-e-avadh nahīñ hai

ki sham.a ab tak jalī nahīñ hai

ye sub.h sub.h-e-tarab nahīñ hai

ki sham.a ab tak bujhī nahīñ hai

ye vaqt kā ik ajiib lamha hai jis kī sharyānoñ meñ ḳhuun jamne lagā hai

ye ek afsūn-e-dilbarī hai

na sub.h-e-vaslat na shām-e-hijrāñ

na bū-e-yūsuf na chaak dāmāñ

tumhāre āñchal kī bazm-e-parvīñ ujaḌ chukī hai

tumhārī mauj-e-yaqīñ se kitne guloñ ke chehre utar ga.e haiñ

tumhāre qadmoñ kī āhaToñ ne chaman ko vīrāñ banā diyā hai

ye sham sham-e-awadh nahin hai jise tumhaari siyah zulfen chhupa sakengi

ye subh subh-e-tarab nahin hai

ye ek dhundlaka hai ek kohra

ubharte suraj ki garm kirnon ke KHwab sayyal ho gae hain

zamin apni ragon ki garmi luTa chuki hai

hayat aansu baha rahi hai

har ek barg-o-samar pe moti jhalak rahe hain

tum apne aanchal pe bazm-e-parwin saja chuki ho

tum apne anfas ke jilau mein hazaron ghunche khila chuki ho

KHiram-e-nazuk ki sahiri se zamin ko jannat bana chuki ho

tum ek tabassum se kitni shamen jala chuki ho

magar ye sham-e-awadh nahin hai

ki shama ab tak jali nahin hai

ye subh subh-e-tarab nahin hai

ki shama ab tak bujhi nahin hai

ye waqt ka ek ajib lamha hai jis ki sharyanon mein KHun jamne laga hai

ye ek afsun-e-dilbari hai

na subh-e-waslat na sham-e-hijran

na bu-e-yusuf na chaak daman

tumhaare aanchal ki bazm-e-parwin ujaD chuki hai

tumhaari mauj-e-yaqin se kitne gulon ke chehre utar gae hain

tumhaare qadmon ki aahaTon ne chaman ko viran bana diya hai