junun-zat

ham junūñ-zāt tire hukm pe nikle jānāñ

aise nikle haiñ ki shāyad hī palaT kar aa.eñ

dil ne ik ḳhvāb jo dekhā to pukārā uTh ke

hukm utrā hai ki ghar-bār ko tanhā chhoḌeñ

apnī vaadī se kisī dasht ko hijrat pakḌeñ

apne bāġhāt-o-chaman-zār ko tanhā chhoḌeñ

is se pahle ki rag-o-pai meñ siyāhī phaile

apne darbār-e-tarab-zār se bāhar nikleñ

is se pahle ki shab-e-zīst kā pahlū badle

rāhateñ tark kareñ aur safar par nikleñ

aur jab raah talāsheñ to safar meñ aise

ki qadam dard ke māroñ ke havāle kar deñ

apne hāthoñ ko yatīmoñ ke saroñ par rakh deñ

apnī āñkhoñ ko bichāroñ ke havāle kar deñ

itnā sunñā thā ki bas raḳht-e-mohabbat bāñdhā

apne andar kī kudūrat ke daroñ ko toḌā

apnī ḳhvāhish-zada ‘ādāt pe taale Daale

apnī ḳhud-ġharz tamannāoñ ko pīchhe chhoḌā

aur hamrāh tire pyaar parinde le kar

apne hāthoñ meñ tirī chaah kī sham'eñ thāme

apne hoñToñ pe tire dard ke naġhme le kar

apne māthe pe tire shauq kā sahrā bāñdhe

ham junūñ-zāt tire hukm pe ḳhud se nikle

aise nikle haiñ ki shāyad hī palaT kar aa.eñ

hum junun-zat tere hukm pe nikle jaanan

aise nikle hain ki shayad hi palaT kar aaen

dil ne ek KHwab jo dekha to pukara uTh ke

hukm utra hai ki ghar-bar ko tanha chhoDen

apni wadi se kisi dasht ko hijrat pakDen

apne baghat-o-chaman-zar ko tanha chhoDen

is se pahle ki rag-o-pai mein siyahi phaile

apne darbar-e-tarab-zar se bahar niklen

is se pahle ki shab-e-zist ka pahlu badle

rahaten tark karen aur safar par niklen

aur jab rah talashen to safar mein aise

ki qadam dard ke maron ke hawale kar den

apne hathon ko yatimon ke saron par rakh den

apni aankhon ko bichaaron ke hawale kar den

itna sunna tha ki bas raKHt-e-mohabbat bandha

apne andar ki kudurat ke daron ko toDa

apni KHwahish-zada ‘adat pe tale Dale

apni KHud-gharz tamannaon ko pichhe chhoDa

aur hamrah tere pyar parinde le kar

apne hathon mein teri chah ki sham'en thame

apne honTon pe tere dard ke naghme le kar

apne mathe pe tere shauq ka sahra bandhe

hum junun-zat tere hukm pe KHud se nikle

aise nikle hain ki shayad hi palaT kar aaen