justuju

tasavvur meñ saare jahāñ dekhtī huuñ

makīñ dekhtī huuñ makāñ dekhtī huuñ

bhaTaktī phirī saare aalam meñ har sū

jahāñ maiñ nahīñ huuñ vahāñ dekhtī huuñ

chamakte sitāroñ meñ dekhā hai us ko

maiñ jharnoñ meñ us ko nihāñ dekhtī huuñ

kabhī chāñd sūraj kī kirnoñ meñ DhūñDā

vahāñ rañg-ba-rañg kahkashāñ dekhtī huuñ

kabhī us ko phūloñ kī ḳhushbū meñ dekhā

fazāoñ meñ us ko ayaañ dekhtī huuñ

ye mausam badalte jahānoñ ke dekhe

maiñ shabnam meñ us kā samāñ dekhtī huuñ

ba-dosh-e-sabā uḌ ke pahuñchī jahāñ tak

maiñ samt-e-jahāñ be-karāñ dekhtī huuñ

chalūñ phir yahāñ se zarā aur aage

maiñ sāhil pe mauj-e-ravāñ dekhtī huuñ

nazar meñ junūñ ke hai nafrat har ik sū

diloñ meñ maiñ tīr-o-kamāñ dekhtī huuñ

na insāñ meñ ulfat na insāniyat hai

sulagte laboñ par fuġhāñ dekhtī huuñ

na paayā sukūñ kyoñ 'adā' maiñ ne āḳhir

tapish apne dil kī tapāñ dekhtī huuñ

tasawwur mein sare jahan dekhti hun

makin dekhti hun makan dekhti hun

bhaTakti phiri sare aalam mein har su

jahan main nahin hun wahan dekhti hun

chamakte sitaron mein dekha hai us ko

main jharnon mein us ko nihan dekhti hun

kabhi chand suraj ki kirnon mein DhunDa

wahan rang-ba-rang kahkashan dekhti hun

kabhi us ko phulon ki KHushbu mein dekha

fazaon mein us ko ayan dekhti hun

ye mausam badalte jahanon ke dekhe

main shabnam mein us ka saman dekhti hun

ba-dosh-e-saba uD ke pahunchi jahan tak

main samt-e-jahan be-karan dekhti hun

chalun phir yahan se zara aur aage

main sahil pe mauj-e-rawan dekhti hun

nazar mein junun ke hai nafrat har ek su

dilon mein main tir-o-kaman dekhti hun

na insan mein ulfat na insaniyat hai

sulagte labon par fughan dekhti hun

na paya sukun kyon 'ada' main ne aaKHir

tapish apne dil ki tapan dekhti hun