kash

mujh meñ ai yaar mire koī kamālāt na dekh

ḳhvāb vo huuñ jo kabhī bhī na haqīqat meñ Dhalā

koī sāhil nahīñ manzil na koī mo.ajiza huuñ

ahl-e-bāzār kā chāhā huā sāmāñ bhī kahāñ

jo laboñ par ho zamāne ke na vo naġhma huuñ

mere kahne se na rut koī suhānī aa.e

merī chāhat se na kaliyoñ pe javānī chhā.e

mere jazboñ meñ kashish suljhe ḳhayālāt na dekh

mujh meñ ai yaar mire koī kamālāt na dekh

maiñ to is dahr kā chhoTā sā bashar huuñ jis ne

jiinā marnā bhī faqat mulk kī ḳhātir chāhā

zulmat-e-shab ke thapeḌoñ se ulajhne ke liye

zulm o āzār ke haivānoñ se laḌnā chāhā

mere hāthoñ ne ka.ī baar uThā.e patthar

mujh meñ parvāz-e-baġhāvat ne panapnā chāhā

mere jazbāt-o-tasavvur meñ baḌī shiddat thī

aag par chalne kī qadmoñ ko baḌī chāhat thī

laḌne vāloñ meñ kabhī ek mirā naam bhī thā

apne hāthoñ se kabhī ek mirā naam bhī thā

ḳhushnumā rañg fazāoñ meñ bikherūñgā kabhī

kuchh ujāloñ ke shajar maiñ bhī ugā.ūñgā kabhī

chhoTī hī sham.a sahī maiñ bhī jalā.ūñgā kabhī

par kahāñ ho sakā jo dil ne mire chāhā thā

maiñ ne rasta vo chunā raas na jo aayā thā

ḳhud-ġharaz shaḳhs ke har ek irāde kī tarah

merī chāhat ke qadam jaane kahāñ jā pahuñche

jin meñ hiire sī chamak lagtā thā aa jā.egī

mujh meñ vo sañg the jo mujh se tarāshe na ga.e

apne sāgar se guhar mujh se nikāle na ga.e

mujh se rāhoñ meñ qadam soch ke Daale na ga.e

ab ye aalam hai ki jiine ke liye jiitā huuñ

ek afsos o kasak dil meñ liye phirtā huuñ

apne siine meñ ka.ī bojh liye barsoñ se

rahguzar meñ thakā be-sūd safar kartā huuñ

maiñ huuñ sāgar meñ phañsī tanhā sī kashtī kī tarah

jis kī qismat meñ sivā bahne ke ab kuchh bhī nahīñ

maiñ vo gul huuñ jo mahaktā to hai āñgan meñ mire

jis kī ḳhushbū ne zamāne ko diyā kuchh bhī nahīñ

mujh meñ ik haare sikandar ke sivā kuchh bhī na dekh

merī sīrat meñ farozāñ sī hikāyāt na dekh

mujh meñ ai yaar mire koī kamālāt na dekh

mujh mein ai yar mere koi kamalat na dekh

KHwab wo hun jo kabhi bhi na haqiqat mein Dhala

koi sahil nahin manzil na koi moajiza hun

ahl-e-bazar ka chaha hua saman bhi kahan

jo labon par ho zamane ke na wo naghma hun

mere kahne se na rut koi suhani aae

meri chahat se na kaliyon pe jawani chhae

mere jazbon mein kashish suljhe KHayalat na dekh

mujh mein ai yar mere koi kamalat na dekh

main to is dahr ka chhoTa sa bashar hun jis ne

jina marna bhi faqat mulk ki KHatir chaha

zulmat-e-shab ke thapeDon se ulajhne ke liye

zulm o aazar ke haiwanon se laDna chaha

mere hathon ne kai bar uThae patthar

mujh mein parwaz-e-baghawat ne panapna chaha

mere jazbaat-o-tasawwur mein baDi shiddat thi

aag par chalne ki qadmon ko baDi chahat thi

laDne walon mein kabhi ek mera nam bhi tha

apne hathon se kabhi ek mera nam bhi tha

KHushnuma rang fazaon mein bikherunga kabhi

kuchh ujalon ke shajar main bhi ugaunga kabhi

chhoTi hi shama sahi main bhi jalaunga kabhi

par kahan ho saka jo dil ne mere chaha tha

main ne rasta wo chuna ras na jo aaya tha

KHud-gharaz shaKHs ke har ek irade ki tarah

meri chahat ke qadam jaane kahan ja pahunche

jin mein hire si chamak lagta tha aa jaegi

mujh mein wo sang the jo mujh se tarashe na gae

apne sagar se guhar mujh se nikale na gae

mujh se rahon mein qadam soch ke Dale na gae

ab ye aalam hai ki jine ke liye jita hun

ek afsos o kasak dil mein liye phirta hun

apne sine mein kai bojh liye barson se

rahguzar mein thaka be-sud safar karta hun

main hun sagar mein phansi tanha si kashti ki tarah

jis ki qismat mein siwa bahne ke ab kuchh bhi nahin

main wo gul hun jo mahakta to hai aangan mein mere

jis ki KHushbu ne zamane ko diya kuchh bhi nahin

mujh mein ek haare sikandar ke siwa kuchh bhi na dekh

meri sirat mein farozan si hikayat na dekh

mujh mein ai yar mere koi kamalat na dekh