kabhi kabhi

kuchh yuuñ badal gayā mirā tarz-e-bayāñ kabhī kabhī

jaise zabān hotī hai ḳhud be-zabāñ kabhī kabhī

ḳhud se hī ho gayā huuñ maiñ bezār haañ kabhī kabhī

guzrī ye zindagī mujhe itnī garāñ kabhī kabhī

de kar ġham-e-jahāñ mujhe ashkoñ pe mere bandisheñ

yuuñ bhī liyā hai tū ne mirā imtihāñ kabhī kabhī

vo shiddat-e-bayāñ ho ki ho jur.at-e-bayān-e-haq

gustāḳh itnī ho ga.ī merī zabāñ kabhī kabhī

yā un ke iltifāt se maiñ āshnā huā yuuñ hī

yā ittifāq se hue vo gul-nishāñ kabhī kabhī

sharmā ke rah ga.ī mirī manzil kī justujū kabhī

tharrā ke rah gayā mirā dard-e-nihāñ kabhī kabhī

jaise ġharīb farsh pe sotā hai thak ke muzmahil

aksar yuuñ so gayā mirā azm-e-javāñ kabhī kabhī

kuchh vāqi.āt-e-zindagī kuchh hādsāt-e-dil se bhī

dilchasp ho ga.ī hai mirī dāstāñ kabhī kabhī

girya ke lutf se na maiñ mahrūm ho sakā kabhī

insāf merā yuuñ huā tere yahāñ kabhī kabhī

kuchh yun badal gaya mera tarz-e-bayan kabhi kabhi

jaise zaban hoti hai KHud be-zaban kabhi kabhi

KHud se hi ho gaya hun main bezar han kabhi kabhi

guzri ye zindagi mujhe itni garan kabhi kabhi

de kar gham-e-jahan mujhe ashkon pe mere bandishen

yun bhi liya hai tu ne mera imtihan kabhi kabhi

wo shiddat-e-bayan ho ki ho jurat-e-bayan-e-haq

gustaKH itni ho gai meri zaban kabhi kabhi

ya un ke iltifat se main aashna hua yun hi

ya ittifaq se hue wo gul-nishan kabhi kabhi

sharma ke rah gai meri manzil ki justuju kabhi

tharra ke rah gaya mera dard-e-nihan kabhi kabhi

jaise gharib farsh pe sota hai thak ke muzmahil

aksar yun so gaya mera azm-e-jawan kabhi kabhi

kuchh waqiat-e-zindagi kuchh hadsat-e-dil se bhi

dilchasp ho gai hai meri dastan kabhi kabhi

girya ke lutf se na main mahrum ho saka kabhi

insaf mera yun hua tere yahan kabhi kabhi