kabhi likhna

kabhī likhnā

hamāre baa'd jo guzrī

kabhī likhnā

kaThin rastoñ pe kaise zindagī kī shaam hotī hai

kisī kī yaad meñ aate hue aañsū ko kaise rok lete haiñ

koī aahaT koī dastak agar ubhre

to ik mauhūm sī ummīd kaise Tuut jaatī hai

kabhī likhnā

tumheñ mā'lūm to hogā

tumhārā chāhne vaalā

ka.ī qarzoñ meñ jakḌā hai

use ik 'umr ke badle

ka.ī qarze chukāne haiñ

tumheñ mā'lūm to hogā

vo raste jo tumhāre ghar ko aate the

vahāñ dīvār haa.il hai

magar har shaam ko phir bhī

tumhārī aañkh kā raushan sitāra

aaj bhī biite dinoñ kī yaad ko

dil meñ basāne ke liye dekho

unhīñ rastoñ pe rahtā hai

magar sūraj ke Dhalte hī

sitāra TuuT jaatā hai

to kyā mahsūs hotā hai

agar ye tum se mumkin ho

kabhī likhnā

kabhī likhnā

hamāre baa'd shahr-e-jāñ kā vo 'ālam

galī kūchoñ kā vo manzar

vo āñkheñ jo hamāre naam se raushan

sitāroñ kī tarah se jhilmilātī thiiñ

vo 'āriz jo hamāre lams se mahke

vo gesū jo hamāre haal pe aksar

daraḳhtoñ kī tarah saaya sā karte the

vo paikar bhī jise ham pyaar karte the

hai kyā ab bhī hamārī yaad meñ qaa.em

kabhī fursat mile tum ko

to phir likhnā

kabhi likhna

hamare ba'd jo guzri

kabhi likhna

kaThin raston pe kaise zindagi ki sham hoti hai

kisi ki yaad mein aate hue aansu ko kaise rok lete hain

koi aahaT koi dastak agar ubhre

to ek mauhum si ummid kaise Tut jati hai

kabhi likhna

tumhein ma'lum to hoga

tumhaara chahne wala

kai qarzon mein jakDa hai

use ek 'umr ke badle

kai qarze chukane hain

tumhein ma'lum to hoga

wo raste jo tumhaare ghar ko aate the

wahan diwar hail hai

magar har sham ko phir bhi

tumhaari aankh ka raushan sitara

aaj bhi bite dinon ki yaad ko

dil mein basane ke liye dekho

unhin raston pe rahta hai

magar suraj ke Dhalte hi

sitara TuT jata hai

to kya mahsus hota hai

agar ye tum se mumkin ho

kabhi likhna

kabhi likhna

hamare ba'd shahr-e-jaan ka wo 'alam

gali kuchon ka wo manzar

wo aankhen jo hamare nam se raushan

sitaron ki tarah se jhilmilati thin

wo 'ariz jo hamare lams se mahke

wo gesu jo hamare haal pe aksar

daraKHton ki tarah saya sa karte the

wo paikar bhi jise hum pyar karte the

hai kya ab bhi hamari yaad mein qaem

kabhi fursat mile tum ko

to phir likhna