kabhi na aaenge jaane wale

kahāñ ga.e vo

vatan kī ismat bachāne vaale

vaqār-o-azmat baḌhāne vaale

vafā kā parcham uThāne vaale unheñ bulāo ham un kī āñkhoñ se aaj apne vatan ko dekheñ

kahāñ ga.e vo

jo dāstān-e-vafā ko apne lahū se tahrīr kar rahe the

jo apnī āñkhoñ kī qīmatoñ par bhī ḳhvāb ta.abīr kar rahe the

jo raushnī ke safīr ban kar diloñ meñ tanvīr kar rahe the

vafā meñ zanjīr ho rahe the jafā ko zanjīr kar rahe the

kahāñ ga.e vo qazā ko tasḳhīr karne vaale unheñ bulāo ham un kī āñkhoñ se aaj apne vatan ko dekheñ

kahāñ ga.e vo

ḳhizāñ ko shādāb karne vaale

lahū ko sailāb karne vaale

sitam ko ġharqāb karne vaale

kahāñ ga.e vo vatan ko āzād karne vaale unheñ bulāo ham un kī āñkhoñ se aaj apne vatan ko dekheñ

kahāñ ga.e vo

sahar kā imkān karne vaale harīf-e-zulmat

saroñ ko qurbān karne vaale amīn-e-jannat

vatan pe ehsān karne vaale naqīb-e-hashmat

kahāñ haiñ āḳhir

sitam kī sham.eñ bujhāne vaale

salīb-o-maqtal sajāne vaale kabhī na ā.eñge jaane vaale

kahan gae wo

watan ki ismat bachane wale

waqar-o-azmat baDhane wale

wafa ka parcham uThane wale unhen bulao hum un ki aankhon se aaj apne watan ko dekhen

kahan gae wo

jo dastan-e-wafa ko apne lahu se tahrir kar rahe the

jo apni aankhon ki qimaton par bhi KHwab tabir kar rahe the

jo raushni ke safir ban kar dilon mein tanwir kar rahe the

wafa mein zanjir ho rahe the jafa ko zanjir kar rahe the

kahan gae wo qaza ko tasKHir karne wale unhen bulao hum un ki aankhon se aaj apne watan ko dekhen

kahan gae wo

KHizan ko shadab karne wale

lahu ko sailab karne wale

sitam ko gharqab karne wale

kahan gae wo watan ko aazad karne wale unhen bulao hum un ki aankhon se aaj apne watan ko dekhen

kahan gae wo

sahar ka imkan karne wale harif-e-zulmat

saron ko qurban karne wale amin-e-jannat

watan pe ehsan karne wale naqib-e-hashmat

kahan hain aaKHir

sitam ki shamen bujhane wale

salib-o-maqtal sajaane wale kabhi na aaenge jaane wale