kabhi socha hai tumne

sub.h shaam rātoñ meñ

sochtī rahtī huuñ kuchh

be-sabab ḳhalā meñ nihārtī rahtī huuñ

kabhī merī āñkhoñ ke aage

kuchh lafz raqs karne lagte haiñ

lekin jab kabhī maiñ in lafzoñ ko kāġhaz ke kore badan par Tañknā chāhtī huuñ

to ye lafz uḌ kar havā meñ tahlīl ho jaate haiñ

aur āñkhoñ ke aage

mahaz dhuāñ sā rah jaatā hai

kabhī sochā hai tum ne ki

aisā kyoñ hotā hai

ki chhat kī muñDer par baiThī

hazāroñ miil kā safar

tai kar letī huuñ

jab ki tum saath nahīñ hote

albatta tumhārā lams

tumhārī ḳhushbū

merī ham-safar hotī hai

kabhī sochā hai tum ne ki

āñkheñ kyoñ muztarib rahtī haiñ

nīñdeñ kyoñ rūThī huī haiñ

kyā koī lamha

vasl kī sūrat

judā.ī kā karb

tanhā.ī kā azaab

jazb karne vaalā hai

subh sham raaton mein

sochti rahti hun kuchh

be-sabab KHala mein nihaarti rahti hun

kabhi meri aankhon ke aage

kuchh lafz raqs karne lagte hain

lekin jab kabhi main in lafzon ko kaghaz ke kore badan par Tankna chahti hun

to ye lafz uD kar hawa mein tahlil ho jate hain

aur aankhon ke aage

mahaz dhuan sa rah jata hai

kabhi socha hai tum ne ki

aisa kyon hota hai

ki chhat ki munDer par baiThi

hazaron mil ka safar

tai kar leti hun

jab ki tum sath nahin hote

albatta tumhaara lams

tumhaari KHushbu

meri ham-safar hoti hai

kabhi socha hai tum ne ki

aankhen kyon muztarib rahti hain

ninden kyon ruThi hui hain

kya koi lamha

wasl ki surat

judai ka karb

tanhai ka azab

jazb karne wala hai