kahan jins-e-shabnam ka bazar hai

zarā tum darīche se bāhar to jhāñko

kaun nālā-kunāñ hai ye kaisī fuġhāñ hai

aTārī meñ dekho

kahīñ koī billī na ghus aa.ī ho

ye kyā hai

abābīl ke jhunD kā shor hai

darīche kī jaalī se bāhar to dekho

har ik samt āh-o-bukā hai

mirā dil hai jis se musalsal hirāsāñ

mirā dil

jo ulfat ke naġhmoñ se māmūr thā

tilism-e-bahārāñ se masrūr thā

vo dil jis ko sāda-mizājī kā ulfat kā atiya milā hai

vo dil shor-e-fariyād-e-āh-o-fuġhāñ qahr-e-mātam kahāñ tak sahegā

dhaḌkaneñ tham ga.iiñ

zindagī dam-ba-ḳhud hai

zarā phir darīche se bāhar to jhāñko

kaun hai jo laraztā huā sāñseñ ukhḌī huī

bhāgtā jā rahā hai

mirī ruuh goyā shikanje meñ mahbūs hai

uTho ġhaur se uTh ke dekho

kaun hai ye

hirāsāñ hirāsāñ kamāñ aisī sūrat

mujhe aisā lagtā hai ye merā saaya hai

jo mujh se kahīñ par judā ho gayā thā

kaun hai shab ga.e mere dar par

kis kī dastak hai ye

tumheñ pyaar kā vāsta yuuñ na baiThe raho

aise aalam meñ darvāza mat kholnā

darīchoñ ke pīchhe se mat jhāñknā

kaisī pur-haul shab hai jise barf-bārī ne sulgā diyā

jān-e-jāñ

anginat ashk kab se bahātā rahā huuñ ki ab

chashm-e-giryāñ meñ paanī nahīñ hai

kahāñ jā ke DhūñDūñ vo ashkoñ ke motī

aañkh kī jhiil sūkhe to muddat huī

kahāñ jins-e-shabnam kā bāzār hai

darīche se bāhar to dekho

zara tum dariche se bahar to jhanko

kaun nala-kunan hai ye kaisi fughan hai

aTari mein dekho

kahin koi billi na ghus aai ho

ye kya hai

ababil ke jhunD ka shor hai

dariche ki jali se bahar to dekho

har ek samt aah-o-buka hai

mera dil hai jis se musalsal hirasan

mera dil

jo ulfat ke naghmon se mamur tha

tilism-e-bahaaran se masrur tha

wo dil jis ko sada-mizaji ka ulfat ka atiya mila hai

wo dil shor-e-fariyaad-e-ah-o-fughan qahr-e-matam kahan tak sahega

dhaDkanen tham gain

zindagi dam-ba-KHud hai

zara phir dariche se bahar to jhanko

kaun hai jo larazta hua sansen ukhDi hui

bhagta ja raha hai

meri ruh goya shikanje mein mahbus hai

uTho ghaur se uTh ke dekho

kaun hai ye

hirasan hirasan kaman aisi surat

mujhe aisa lagta hai ye mera saya hai

jo mujh se kahin par juda ho gaya tha

kaun hai shab gae mere dar par

kis ki dastak hai ye

tumhein pyar ka wasta yun na baiThe raho

aise aalam mein darwaza mat kholna

darichon ke pichhe se mat jhankna

kaisi pur-haul shab hai jise barf-bari ne sulga diya

jaan-e-jaan

anginat ashk kab se bahata raha hun ki ab

chashm-e-giryan mein pani nahin hai

kahan ja ke DhunDun wo ashkon ke moti

aankh ki jhil sukhe to muddat hui

kahan jins-e-shabnam ka bazar hai

dariche se bahar to dekho