kahani

ik din us ne mere dil ke darvāze par dastak dī thī

aur mire ḳhvāboñ kī duniyā meñ armānoñ kā jashn huā thā

kaliyāñ mahkīñ phuul khile the

har-sū ḳhushbū phail ga.ī thī

us ko dekhā dekh ke sochā

us jaisā is duniyā meñ shāyad koī aur na hogā

aisā paikar aisā chehrā kab dekhā thā maiñ ne

marmar kī ik mūrat ko chalte-phirte dekh liyā thā

kitne samundar poshīda the āñkhoñ kī gahrā.ī meñ

kitnī bahāreñ khel rahī thiiñ us ke hasīñ ruḳhsāroñ par

ik din maiñ ne

us ke dil ke darvāze par dastak dī thī

pyaar huā thā

kaliyāñ chaTkīñ phuul khile the

har-sū ḳhushbū phail ga.ī thī

ik din us ke darvāze par shahnā.ī bajī thī

anjān-nagar kā ik shahzāda zartār qabā meñ aayā thā

us ko le kar duur gayā anjān-nagar kā shahzāda

ik din maiñ ne us ko dekhā

vīrānī ke manzar the ab ḳhushk samundar āñkhoñ meñ

aur ḳhizāñ kā raqs thā us ke sūkhe hue ruḳhsāroñ par

logoñ se ahvāl sunā

anjān-nagar kā shahzāda

us ko tanhā chhoḌ gayā thaa!

ek din us ne mere dil ke darwaze par dastak di thi

aur mere KHwabon ki duniya mein armanon ka jashn hua tha

kaliyan mahkin phul khile the

har-su KHushbu phail gai thi

us ko dekha dekh ke socha

us jaisa is duniya mein shayad koi aur na hoga

aisa paikar aisa chehra kab dekha tha main ne

marmar ki ek murat ko chalte-phirte dekh liya tha

kitne samundar poshida the aankhon ki gahrai mein

kitni bahaaren khel rahi thin us ke hasin ruKHsaron par

ek din main ne

us ke dil ke darwaze par dastak di thi

pyar hua tha

kaliyan chaTkin phul khile the

har-su KHushbu phail gai thi

ek din us ke darwaze par shahnai baji thi

anjaan-nagar ka ek shahzada zartar qaba mein aaya tha

us ko le kar dur gaya anjaan-nagar ka shahzada

ek din main ne us ko dekha

virani ke manzar the ab KHushk samundar aankhon mein

aur KHizan ka raqs tha us ke sukhe hue ruKHsaron par

logon se ahwal suna

anjaan-nagar ka shahzada

us ko tanha chhoD gaya tha!