kahin se shama uTha lao

hazār laakh umīdoñ kā ham-safar sūraj

yahāñ se duur bahut duur thak ke baiTh gayā

kabhī vo dil ke darīche se jhāñktā thā kabhī

ulajhtā rahtā thā palkoñ kī chhāñv se aksar

mirī ragoñ meñ ravāñ thā kabhī lahū kī tarah

kitāb-e-umr kā chālīsvāñ varaq chhū kar

ulajh gayā huuñ koī rāsta nahīñ miltā

yahāñ se duur bahut duur tak añdherā hai

adhūrī raah pe sūraj ne saath chhoḌ diyā

kahīñ se sham.a uThā laao taaki dekh sakūñ

mirī hayāt kā aglā varaq bhī hai ki nahīñ

kahīñ se sham.a uThā laao

varna ye sāñseñ

mirī hayāt ke aurāq muntashir karke

bigāḌ deñgī mire dard kī kahānī ko

ye vo kahānī hai jis ko na koī jaan sakā

ḳhud apne aap ko paḌhne kī aarzū hī rahī

koī paḌhe na paḌhe ḳhud hī paḌh ke dekh to luuñ

ḳhud apne dard pe ro.uuñ hañsūñ ki chup hī rahūñ

ye merī āḳhirī ḳhvāhish kā āḳhirī lamha

guzārnā hai jise har tarah se apne liye

yahī hai sā.at-e-bedār

is añdhere meñ

kahīñ se sham.a uThā laao raushnī ke liye

hazar lakh umidon ka ham-safar suraj

yahan se dur bahut dur thak ke baiTh gaya

kabhi wo dil ke dariche se jhankta tha kabhi

ulajhta rahta tha palkon ki chhanw se aksar

meri ragon mein rawan tha kabhi lahu ki tarah

kitab-e-umr ka chaaliswan waraq chhu kar

ulajh gaya hun koi rasta nahin milta

yahan se dur bahut dur tak andhera hai

adhuri rah pe suraj ne sath chhoD diya

kahin se shama uTha lao taki dekh sakun

meri hayat ka agla waraq bhi hai ki nahin

kahin se shama uTha lao

warna ye sansen

meri hayat ke auraq muntashir karke

bigaD dengi mere dard ki kahani ko

ye wo kahani hai jis ko na koi jaan saka

KHud apne aap ko paDhne ki aarzu hi rahi

koi paDhe na paDhe KHud hi paDh ke dekh to lun

KHud apne dard pe roun hansun ki chup hi rahun

ye meri aaKHiri KHwahish ka aaKHiri lamha

guzarna hai jise har tarah se apne liye

yahi hai saat-e-bedar

is andhere mein

kahin se shama uTha lao raushni ke liye