kaif-e-mausiqi

uñgliyoñ ne chhū diyā barbat kī dhun bahne lagī

abr-e-mausīqī se vo chhan chhan ke ye kahne lagī

thaam lo dil ko jahāñ mad.hosh ho jaane ko hai

god meñ merī abhī ḳhāmosh ho jaane ko hai

naġhma kī pahlī kiran meñ kho gayā tār-e-rabāb

niiñd sī aane lagī sone lagā merā shabāb

yak-ba-yak dhārā sā ik bahne lagā be-iḳhtiyār

bah chalā mānind-e-dariyā chhā gayā misl-e-bahār

rāgnī kī dhaar ne phir chhū liyā dil ko mire

sail-e-mausīqī ne paanī kar diyā dil ko mire

kaif-e-mausīqī ne paanī kar diyā dil ko mire

kho ga.iiñ ublīñ bahīñ bah kar thamīñ tham kar bahīñ

ek duniyā murta.ish thī mauja-e-naġhmāt par

ik ajab ḳhvābīdgī taarī thī kā.enāt par

daur-e-mausīqī meñ din thā aur na thī taḳhsīs-e-shab

ek vaqt-e-jāvedāñ ik arsa-e-mauj-e-tarab

ungliyon ne chhu diya barbat ki dhun bahne lagi

abr-e-mausiqi se wo chhan chhan ke ye kahne lagi

tham lo dil ko jahan madhosh ho jaane ko hai

god mein meri abhi KHamosh ho jaane ko hai

naghma ki pahli kiran mein kho gaya tar-e-rabab

nind si aane lagi sone laga mera shabab

yak-ba-yak dhaara sa ek bahne laga be-iKHtiyar

bah chala manind-e-dariya chha gaya misl-e-bahaar

ragni ki dhaar ne phir chhu liya dil ko mere

sail-e-mausiqi ne pani kar diya dil ko mere

kaif-e-mausiqi ne pani kar diya dil ko mere

kho gain ublin bahin bah kar thamin tham kar bahin

ek duniya murtaish thi mauja-e-naghmat par

ek ajab KHwabidgi tari thi kaenat par

daur-e-mausiqi mein din tha aur na thi taKHsis-e-shab

ek waqt-e-jawedan ek arsa-e-mauj-e-tarab