kamra number 404

saḌak kināre baiTh ke aksar

isrā.īl maut kā manzar

khīñchā kartā

gahrī raat ke kaale saa.e

shankar ke Damrū kī dab dab

meñ raqs karte

ḳhūb-sūrat farishtoñ kī jamā.at

ik muddat se miTTī ke putloñ

ko hī sajda kartī

phir ik dam se kis ne havāoñ

ke ruḳh ko badal Daalā

din ko raat aur raat ko din

meñ tabdīl kar Daalā

sabhī rang āsmān se uḌā le gayā

na koī aaya

na koī saayā

haañ sunā hai ki

kamra number 404 meñ ik bīmār sī

dikhne vaalī aurat

ro paḌtī hai

hañste hañste ro paḌtī hai

girte-paḌte ro paḌtī hai

na jaane vo kaun sā dukh hai

jis ko le ke ro paḌtī hai

aañsū us ke dekh ke maiñ

dukh pī jaatā huuñ

ḳhud ke tishna-lab ko

dariyā meñ paatā huuñ

vo kahtī hai

chaak ghumā.ī

aur aadam kī sūrat banā.ī

havvā ke kaleje ko

kāñToñ se bhar Daalā

aur tab se dard qaid kar rakkhā hai is

banjar jism meñ

chheḌ rahā hai ik ik kar ke

merī paak ruuh ko

jise nāpāk karne ko ka.ī haath

ik saath uThe

jise barbād karne ko ka.ī

raag ik saath gungunā.e ga.e

par koī ise ābād karne na uThā

maiñ ne ḳhud hī apnī hathelī

pe jalte sūraj ko rakhā

aur band kar lī muTThī

band muTThī bhīñch kar ke

vaqt kī dīvār pe de maarī

aur dham kar ke vaqt maano tham sā gayā

dard kā naqsha merī āñkhoñ

se utar āsmān

meñ samā gayā

saDak kinare baiTh ke aksar

israil maut ka manzar

khincha karta

gahri raat ke kale sae

shankar ke Damru ki dab dab

mein raqs karte

KHub-surat farishton ki jamaat

ek muddat se miTTi ke putlon

ko hi sajda karti

phir ek dam se kis ne hawaon

ke ruKH ko badal Dala

din ko raat aur raat ko din

mein tabdil kar Dala

sabhi rang aasman se uDa le gaya

na koi aaya

na koi saya

han suna hai ki

kamra number 404 mein ek bimar si

dikhne wali aurat

ro paDti hai

hanste hanste ro paDti hai

girte-paDte ro paDti hai

na jaane wo kaun sa dukh hai

jis ko le ke ro paDti hai

aansu us ke dekh ke main

dukh pi jata hun

KHud ke tishna-lab ko

dariya mein pata hun

wo kahti hai

chaak ghumai

aur aadam ki surat banai

hawwa ke kaleje ko

kanTon se bhar Dala

aur tab se dard qaid kar rakkha hai is

banjar jism mein

chheD raha hai ek ek kar ke

meri pak ruh ko

jise napak karne ko kai hath

ek sath uThe

jise barbaad karne ko kai

rag ek sath gungunae gae

par koi ise aabaad karne na uTha

main ne KHud hi apni hatheli

pe jalte suraj ko rakha

aur band kar li muTThi

band muTThi bhinch kar ke

waqt ki diwar pe de mari

aur dham kar ke waqt mano tham sa gaya

dard ka naqsha meri aankhon

se utar aasman

mein sama gaya