kantosgi

jab barf girī kohsāroñ par

ham niiñd meñ chalne vāloñ ne ik giit likhā tyauhāroñ kā

kuchh katbe guzre lamhoñ ke

jo lamhe vaqt kī muTThī se chhīne the naam koī le kar

kuchh aas kī beleñ jhuul rahī thiiñ

lakḌī ke darvāze se

ik saaya ham se dhuup meñ bhī

rahtā thā lams kī duurī par

do-zānū ham bhī baiTh ga.e

ik buuñd musalsal girne se patthar bhī rasta dete haiñ

phir barf pighalne vaalī thī

ik gāñTh lagī us dhāge ko jo bilkul us sā nāzuk hai aur Tuut gayā thā

saḳhtī se

vo saaya mere sar par hai

ham ik duuje ke zaḳhmoñ par ab chuum ke marham rakhte haiñ

ham ḳhushbū bhīge jismoñ kī bharte haiñ

apnī sāñsoñ meñ

dekho ham phir se saath khaḌe

hañste haiñ guzre vaqtoñ par

jab barf giri kohsaron par

hum nind mein chalne walon ne ek git likha tyauhaaron ka

kuchh katbe guzre lamhon ke

jo lamhe waqt ki muTThi se chhine the nam koi le kar

kuchh aas ki belen jhul rahi thin

lakDi ke darwaze se

ek saya hum se dhup mein bhi

rahta tha lams ki duri par

do-zanu hum bhi baiTh gae

ek bund musalsal girne se patthar bhi rasta dete hain

phir barf pighalne wali thi

ek ganTh lagi us dhage ko jo bilkul us sa nazuk hai aur Tut gaya tha

saKHti se

wo saya mere sar par hai

hum ek duje ke zaKHmon par ab chum ke marham rakhte hain

hum KHushbu bhige jismon ki bharte hain

apni sanson mein

dekho hum phir se sath khaDe

hanste hain guzre waqton par