karb-e-musalsal

kal bhī ye karb thā aur tīra-shabī thī lekin

kal to aaya thā koī sub.h-e-nau ummīd liye

ye alag baat ki TuuTe the sitāre kal bhī

mere be-nām se jazbāt kī tardīd liye

kal bhī yūñhī dar-e-zindāñ thā muqaffal lekin

zindagī qaid se is darja pareshān na thī

ziist kā mujh pe koī baar nahīñ thā kal tak

aarzū dil kī shikasta thī pashemān na thī

haañ magar aaj nayā hādisa guzrā hai yahāñ

zindagī ġham se shikasta bhī pareshān bhī hai

dil koī harf-e-ġhalat ban ke miTā jaatā hai

aur har saañs girāñ-bār-o-pashemān bhī hai

mujh ko mā'lūm hai ye qaid ye tanhā.ī-e-shab

sab ke sab merī hī taqdīr kā hāsil kyoñ haiñ

kyoñ ye mahrūmī-e-paiham kā fusūñ taarī hai

ḳhvāhisheñ aaj bhī pāband-e-salāsil kyoñ haiñ

haañ magar tum se mire dard kā rishta bhī nahīñ

‘ishrat-o-‘aish kā māhaul tumheñ raas aaya

maiñ ne jis zo'm meñ rusvā.ī ke tā'ne jhele

us kā anjām-e-balā-ḳhez mire paas aaya

aaj hālāt muāfiq nahīñ ḳhuddārī ke

ik na.ī tishna-labī tesha-zanī laa.ī hai

tum to har tarh se shādāñ ho magar merā ġham

qaid-e-tanhā.ī hai aur jaan pe ban aa.ī hai

aaj bhī karb-e-musalsal kā vahī 'ālam hai

silsila har na.ī uljhan kā isī ġham se hai

aaj bhī zehn meñ zinda haiñ vahī afsāne

jin kā rishta bhī isī gesu-e-pur-ḳham se hai

aaj ḳhud mujh pe mirā josh-e-junūñ hañstā hai

aaj maiñ ishq-e-balā-ḳhez pe sharminda huuñ

aur ye tark-e-mohabbat kī sazā hai shāyad

aaj maiñ ḳhud se gurezāñ huuñ magar zinda huuñ

kal bhi ye karb tha aur tira-shabi thi lekin

kal to aaya tha koi subh-e-nau ummid liye

ye alag baat ki TuTe the sitare kal bhi

mere be-nam se jazbaat ki tardid liye

kal bhi yunhi dar-e-zindan tha muqaffal lekin

zindagi qaid se is darja pareshan na thi

zist ka mujh pe koi bar nahin tha kal tak

aarzu dil ki shikasta thi pasheman na thi

han magar aaj naya hadisa guzra hai yahan

zindagi gham se shikasta bhi pareshan bhi hai

dil koi harf-e-ghalat ban ke miTa jata hai

aur har sans giran-bar-o-pasheman bhi hai

mujh ko ma'lum hai ye qaid ye tanhai-e-shab

sab ke sab meri hi taqdir ka hasil kyon hain

kyon ye mahrumi-e-paiham ka fusun tari hai

KHwahishen aaj bhi paband-e-salasil kyon hain

han magar tum se mere dard ka rishta bhi nahin

‘ishrat-o-‘aish ka mahaul tumhein ras aaya

main ne jis zo'm mein ruswai ke ta'ne jhele

us ka anjam-e-bala-KHez mere pas aaya

aaj haalat muafiq nahin KHuddari ke

ek nai tishna-labi tesha-zani lai hai

tum to har tarh se shadan ho magar mera gham

qaid-e-tanhai hai aur jaan pe ban aai hai

aaj bhi karb-e-musalsal ka wahi 'alam hai

silsila har nai uljhan ka isi gham se hai

aaj bhi zehn mein zinda hain wahi afsane

jin ka rishta bhi isi gesu-e-pur-KHam se hai

aaj KHud mujh pe mera josh-e-junun hansta hai

aaj main ishq-e-bala-KHez pe sharminda hun

aur ye tark-e-mohabbat ki saza hai shayad

aaj main KHud se gurezan hun magar zinda hun