karb ki intiha

tum charlie ke lafzoñ ko udās-tarīn kahte ho

shāyad tum ne merī kahānī nahīñ paḌhī

agar kafka zinda hotā to mujh par ek afsāna

zarūr likhtā

mujhe ummīd hai chekhov aur kafka mil kar

jannat aur jahannum kī darmiyānī

dīvār par baiThe

mere dukhoñ ko likh rahe hoñge

vo mere hālāt par ġham-zada hoñge

aur apne afsāne ḳhudā ko sunā rahe hoñge

jagjīt aur mehdī hasan mere

ġham ḳhudā ke aage gungunā rahe hoñge

marquez merī zindagī par

tanhā.ī ke sau saal kā dūsrā hissa likh rahā hogā

aur vincent merī be-rang zindagī ko

apne canvas par rangīn banā rahā hogā

ye sab mil kar karb kī ek dāstān likheñge

phir use ḳhudā kī bārgāh meñ

pesh kareñge

tab shāyad ḳhudā mujh par rahm ke darvāze khol de

tum charlie ke lafzon ko udas-tarin kahte ho

shayad tum ne meri kahani nahin paDhi

agar kafka zinda hota to mujh par ek afsana

zarur likhta

mujhe ummid hai chekhow aur kafka mil kar

jannat aur jahannum ki darmiyani

diwar par baiThe

mere dukhon ko likh rahe honge

wo mere haalat par gham-zada honge

aur apne afsane KHuda ko suna rahe honge

jagjit aur mehdi hasan mere

gham KHuda ke aage gunguna rahe honge

marquez meri zindagi par

tanhai ke sau sal ka dusra hissa likh raha hoga

aur wincent meri be-rang zindagi ko

apne canwas par rangin bana raha hoga

ye sab mil kar karb ki ek dastan likhenge

phir use KHuda ki bargah mein

pesh karenge

tab shayad KHuda mujh par rahm ke darwaze khol de