kashkol

maiñ jab is shahr meñ aatā huuñ saḌkoñ se guzartā huuñ

to ik chhoTī sī laḌkī yaad aatī hai

darīda pairahan TuuTā huā kashkol hāthoñ meñ

aur us kashkol meñ sikke

magar maiñ us kī sūrat dekh kar hairān hotā thā

ajab sī puḳhtagī thī darj un ma.asūm āñkhoñ meñ

ki jaise zindagī bhar tajraboñ kī bhiik māñgī ho

yahāñ is shahr kī saḌkoñ pe yūñhī saiñkaḌoñ bachche

liye kashkol hāthoñ meñ

savālī rāh-gīroñ se

kise fursat ki in chīzoñ kī tahrīreñ paḌhe samjhe

magar chhoTī sī vo laḌkī baḌī mānūs thī mujh se

vo mujh ko dekhtī to bhaag kar nazdīk aatī thī

zarā sā muskurātī thī

ki jaise koī rishta ho ki jaise koī apnā ho

maiñ us kashkol meñ do-chār sikke Daal detā thā

yuuñ hī bas be-irāda ek din maiñ us ke ghar pahuñchā

bas ik TuuTā huā bosīda kamra thā

aur ik TuuTā palañg jis par

koī ma.azūr aurat thī

jo shāyad us kī maañ hogī

baras guzre

aur us chhoTī sī laḌkī ne

javānī ke zarā nazdīk jab pahlā qadam rakhā

to us ke jism ko shāyad koī kashkol hī samjhā

kalī khilne na paa.ī thī ki ḳhushbū luuT lī us kī

ki vo to be-sahārā thī

use vo de gayā koī jo māñgā hī na thā us ne

ab us kī god meñ nannhī sī ik ma.asūm bachchī thī

bahut din baa'd phir aanā huā us shahr meñ merā

tajassus mujh ko le aayā usī bosīda kamre tak

vahāñ kuchh bhī na badlā thā

vahī bosīda kamra thā vahī TuuTā palañg bhī thā

palañg par thī vahī laḌkī

magar ab vo bas ik ma.azūr aurat thī

usī lamhe darīda pairahan chhoTī sī ik laḌkī

liye TuuTā huā kashkol hāthoñ meñ vahāñ aa.ī

mujhe aisā lagā jaise kahānī bhī purānī thī

vahī kashkol aur sikke vahī chhoTī sī ik laḌkī

aur us ke saath bhī honā vahī thā

jo ab tak hotā aayā thā

use bhī ek din ma.azūr honā thā

kabhī jab shahr kī saḌkoñ pe chhoTī sī koī laḌkī

darīda pairahan kashkol hāthoñ meñ sañbhāle

savālī ban ke mere paas aatī hai

to maiñ kashkol meñ do-chār sikke Daal detā huuñ

ki ik ma.azūr aurat mujh ko fauran yaad aatī hai

main jab is shahr mein aata hun saDkon se guzarta hun

to ek chhoTi si laDki yaad aati hai

darida pairahan TuTa hua kashkol hathon mein

aur us kashkol mein sikke

magar main us ki surat dekh kar hairan hota tha

ajab si puKHtagi thi darj un masum aankhon mein

ki jaise zindagi bhar tajrabon ki bhik mangi ho

yahan is shahr ki saDkon pe yunhi sainkaDon bachche

liye kashkol hathon mein

sawali rah-giron se

kise fursat ki in chizon ki tahriren paDhe samjhe

magar chhoTi si wo laDki baDi manus thi mujh se

wo mujh ko dekhti to bhag kar nazdik aati thi

zara sa muskuraati thi

ki jaise koi rishta ho ki jaise koi apna ho

main us kashkol mein do-chaar sikke Dal deta tha

yun hi bas be-irada ek din main us ke ghar pahuncha

bas ek TuTa hua bosida kamra tha

aur ek TuTa palang jis par

koi mazur aurat thi

jo shayad us ki man hogi

baras guzre

aur us chhoTi si laDki ne

jawani ke zara nazdik jab pahla qadam rakha

to us ke jism ko shayad koi kashkol hi samjha

kali khilne na pai thi ki KHushbu luT li us ki

ki wo to be-sahaara thi

use wo de gaya koi jo manga hi na tha us ne

ab us ki god mein nannhi si ek masum bachchi thi

bahut din ba'd phir aana hua us shahr mein mera

tajassus mujh ko le aaya usi bosida kamre tak

wahan kuchh bhi na badla tha

wahi bosida kamra tha wahi TuTa palang bhi tha

palang par thi wahi laDki

magar ab wo bas ek mazur aurat thi

usi lamhe darida pairahan chhoTi si ek laDki

liye TuTa hua kashkol hathon mein wahan aai

mujhe aisa laga jaise kahani bhi purani thi

wahi kashkol aur sikke wahi chhoTi si ek laDki

aur us ke sath bhi hona wahi tha

jo ab tak hota aaya tha

use bhi ek din mazur hona tha

kabhi jab shahr ki saDkon pe chhoTi si koi laDki

darida pairahan kashkol hathon mein sanbhaale

sawali ban ke mere pas aati hai

to main kashkol mein do-chaar sikke Dal deta hun

ki ek mazur aurat mujh ko fauran yaad aati hai