kashmakash

ek añdhiyāre kone meñ

kuchh Darā Darā kuchh sahmā sā

baiThā thā ek ajnabī

man meñ ek ḳhauf liye

kahīñ chāñdī kī chamak

use andhā na kar de

yā paise kī khanak

pāgal na kar de

maazī kī soch se

āñkhoñ kī khiḌkī par

ek parat sī chaḌh ga.ī namī kī

phir jo dekhā mustaqbil kī or

nazar aayā kuchh bhī nahīñ

ek dhuñd ke sivā

apnī jaḌeñ kaaT kar

chal to paḌā shahr kī or

magar is be-muravvat jahāñ ke

dastūr se nā-vāqif thā vo ajnabī

jo rotā hai yahāñ use aur rulāte haiñ log

utrī sunahrī dhuup

man ke añdhere kone meñ

phir dekhā jo aañkh mal ye jaanā

ki taqdīr ne lā pheñkā hai

ek aise dorāhe par

jahāñ chun paanā apnī raah

koī āsāñ sī baat nahīñ

ek or zamīñ par

bichhī hai kaliyāñ

surḳh gulāb kī

guzartī hai ye raah

ka.ī dilkash nazroñ ko chuum

magar jaatī hai kidhar

ek andhī galī kī or

dūsrā rāsta dhuul meñ sanā

jahāñ kareñge istiqbāl

chand kīleñ kuchh ḳhaar

raah kuchh dushvār hai zarūr

magar yahāñ kī fazā

pur-kaif aur pur-sukūn

chal paḌā vo ajnabī

kāñToñ vaalī raah par

paañv se riste surḳh ḳhuun ke qatre

bikhre zamīn par aise

jaise bichhī ho hazāroñ

surḳh pañkhuḌiyāñ gulāb kī

ek andhiyare kone mein

kuchh Dara Dara kuchh sahma sa

baiTha tha ek ajnabi

man mein ek KHauf liye

kahin chandi ki chamak

use andha na kar de

ya paise ki khanak

pagal na kar de

mazi ki soch se

aankhon ki khiDki par

ek parat si chaDh gai nami ki

phir jo dekha mustaqbil ki or

nazar aaya kuchh bhi nahin

ek dhund ke siwa

apni jaDen kaT kar

chal to paDa shahr ki or

magar is be-murawwat jahan ke

dastur se na-waqif tha wo ajnabi

jo rota hai yahan use aur rulate hain log

utri sunahri dhup

man ke andhere kone mein

phir dekha jo aankh mal ye jaana

ki taqdir ne la phenka hai

ek aise dorahe par

jahan chun pana apni rah

koi aasan si baat nahin

ek or zamin par

bichhi hai kaliyan

surKH gulab ki

guzarti hai ye rah

kai dilkash nazron ko chum

magar jati hai kidhar

ek andhi gali ki or

dusra rasta dhul mein sana

jahan karenge istiqbaal

chand kilen kuchh KHar

rah kuchh dushwar hai zarur

magar yahan ki faza

pur-kaif aur pur-sukun

chal paDa wo ajnabi

kanTon wali rah par

panw se riste surKH KHun ke qatre

bikhre zamin par aise

jaise bichhi ho hazaron

surKH pankhuDiyan gulab ki