katba(4)

vo ik shaḳhs thā

jo akelā thā us kā koī bhī na thā

ik ikaa.ī thā vo

aur ik din ḳhud apnī ikaa.ī meñ zam ho gayā

is ne marte hue ik vasiyyat likhī

jis meñ likkhā thaa!

ai ādmī!

ai vo ik shaḳhs

jo mire marne kī pahlī ḳhabar sun ke dauḌe

aur āvāz de bhā.iyo aao is kā janāza uThāo

aur is āvāz pe koī āvāz us tak na pahuñche

aur phir mujh se bekas akele ko kāñdhoñ pe apne dhare

aur akelī sī ik qabr meñ mujh ko pahuñchā ke mahfūz kar de

merā vo dost itnā sā ehsān mujh par kare

vo mirī qabr par ek saada sā katba lagā.e

aur us par mirā naam likh de

sach kahūñ is se maiñ apnī shohrat nahīñ chāhtā

kyā mirā naam aur kyuuñ vo baaqī rahe

maiñ is vāste chāhtā huuñ ki jab

shahr ke log ye sun ke dauḌeñ

ki dekho ye mash.hūr hai, log kahte haiñ vo shaḳhs to mar gayā

sochte haiñ ye usī kī sharārat na ho

taaki ham log ab us se ġhāfil raheñ

us ke fitne se apne ko mahfūz samjheñ

bas yahī chāhtā huuñ

ki aisā koī shaḳhs DhūñDhe mujhe

to suhulat ho us ko ye tasdīq karne kī

ye shaḳhs sach-much nahīñ hai

vo ab mar chukā hai

maiñ to ab dushmanoñ ke bhī ārām ke haq meñ huuñ

kyuuñ kisī ko kisī se ḳhalal ho?

kyuuñ kisī ko naam se ek dahshat ho?

saare insān duniyā meñ ārām se so.eñ aur ḳhush raheñ

wo ek shaKHs tha

jo akela tha us ka koi bhi na tha

ek ikai tha wo

aur ek din KHud apni ikai mein zam ho gaya

is ne marte hue ek wasiyyat likhi

jis mein likkha tha!

ai aadmi!

ai wo ek shaKHs

jo mere marne ki pahli KHabar sun ke dauDe

aur aawaz de bhaiyo aao is ka janaza uThao

aur is aawaz pe koi aawaz us tak na pahunche

aur phir mujh se bekas akele ko kandhon pe apne dhare

aur akeli si ek qabr mein mujh ko pahuncha ke mahfuz kar de

mera wo dost itna sa ehsan mujh par kare

wo meri qabr par ek sada sa katba lagae

aur us par mera nam likh de

sach kahun is se main apni shohrat nahin chahta

kya mera nam aur kyun wo baqi rahe

main is waste chahta hun ki jab

shahr ke log ye sun ke dauDen

ki dekho ye mashhur hai, log kahte hain wo shaKHs to mar gaya

sochte hain ye usi ki shararat na ho

taki hum log ab us se ghafil rahen

us ke fitne se apne ko mahfuz samjhen

bas yahi chahta hun

ki aisa koi shaKHs DhunDhe mujhe

to suhulat ho us ko ye tasdiq karne ki

ye shaKHs sach-much nahin hai

wo ab mar chuka hai

main to ab dushmanon ke bhi aaram ke haq mein hun

kyun kisi ko kisi se KHalal ho?

kyun kisi ko nam se ek dahshat ho?

sare insan duniya mein aaram se soen aur KHush rahen