kaThor rahen

kaThor rāheñ

jo uljhe dhāgoñ kā ek guchchā sā ban ga.ī haiñ

na un ko rañgoñ kī tez barkhā se kuchh ġharaz hai

vo tez barkhā jo muñh añdhere

kisī pujāran ke kapkapāte safed hoñToñ pe nāchtī hai

na un kī manzil vo shām-e-ġham hai jo ek mailā sā tasht le kar

musāfiroñ se lahū ke qatroñ kī bhiik ro ro ke māñgtī hai

dahakte taare hazīñ duā.eñ larazte hāthoñ se bāñTtī hai

kaThor rāheñ to aage baḌh kar adā dikhā kar palaT ga.ī haiñ

palaT ke pahlū badal ga.ī haiñ

ghanerī shab apnī kaalī kamlī meñ gum khaḌī hai

ye sochtī hai

bhañvar kī be-nūr chashm-e-tar meñ

koī sā sīdhā safed rasta ubhar ke chamke

to shab kā raahī udhar ko lapke

ye shab kā raahī

samay ke dhāre pe bahte bahte bhañvar kī sūrat ubhar gayā hai

hazār rāhoñ meñ ghir gayā hai

kaThor rahen

jo uljhe dhagon ka ek guchcha sa ban gai hain

na un ko rangon ki tez barkha se kuchh gharaz hai

wo tez barkha jo munh andhere

kisi pujaran ke kapkapate safed honTon pe nachti hai

na un ki manzil wo sham-e-gham hai jo ek maila sa tasht le kar

musafiron se lahu ke qatron ki bhik ro ro ke mangti hai

dahakte tare hazin duaen larazte hathon se banTti hai

kaThor rahen to aage baDh kar ada dikha kar palaT gai hain

palaT ke pahlu badal gai hain

ghaneri shab apni kali kamli mein gum khaDi hai

ye sochti hai

bhanwar ki be-nur chashm-e-tar mein

koi sa sidha safed rasta ubhar ke chamke

to shab ka rahi udhar ko lapke

ye shab ka rahi

samay ke dhaare pe bahte bahte bhanwar ki surat ubhar gaya hai

hazar rahon mein ghir gaya hai