KHak aur dhund ka safar

ham ek muddat se dhund aur ḳhaak meñ muallaq

zamīñ kī ḳhushbū sahar kī aahaT ko DhūñDte haiñ

hamārī be-ḳhvāb sard āñkhoñ meñ bujhte mausam kī rangateñ TimTimā rahī haiñ

hamāre pairoñ ke nīche miTTī pighal ke daldal banī huī hai

ulajhtī sāñsoñ kī saḳht girheñ

badan ke andar khīñchī huī haiñ

niDhāl sadiyoñ ke fāsloñ kā safar ki paañv meñ pal rahā hai

dhaḌoñ ke nīche hamārā saaya

hamāre jismoñ ko reza reza nigal rahā hai

(2)

samundaroñ se havā lipaT kar na.ī rutoñ kā visāl māñge

zamīñ kī ḳhushbū sahar kī aahaT ke dhuñdle ḳhvāboñ kā aks phaile

hameñ yaqīñ hai havā ke gadle safar se aage

chamakte lamhoñ kī rahguzar hai

na.e gulāboñ kī sarzamīñ hai

hamāre paañv meñ aane vaale safar kī ḳhvāhish taḌap rahī hai

hamārī āñkhoñ meñ bāvle ḳhvāb kā nasha hai

ham apne apne dhaḌoñ ke tābūt se nikal kar

baḌhe ki sūraj kā jism chhīneñ

zamīñ kī ḳhushbū kā khoj paa.eñ

ham ek muddat se sochte haiñ

ki āsmāñ ke siyāh patthar meñ ab kiran kā shigāf utre

zamīñ kī pātāl se kashish ho

na.e gulāboñ kī mast ḳhushbū badan meñ phaile

magar vahī dhund kā safar hai

kaTī-phaTī sard uñgliyoñ par lahū ke jugnū chamak chamak kar bikhar chuke haiñ

ragoñ ke reshoñ meñ taaza ḳhvāhish kī kashmakash sard paḌ chukī hai

dho.eñ ke phande meñ marne vāloñ ke naam zehnoñ kī taḳhtiyoñ se

utar rahe haiñ

saroñ pe karb-o-balā ke mausam kā saḳht ḳhema khīñchā huā hai

havā pe likkhe hue haiñ nauhe

fazā meñ laTke hue haiñ chehre

ufuq pe TuuTī huī lakīreñ

zamīñ pe phaile hue haiñ saa.e

samundaroñ se lipaTne vaalī havā kī an-dekhī Doriyoñ kā

koī sirā haath meñ nahīñ hai

hamārī palkeñ udhaḌ chukī haiñ

tamām ḳhvāboñ kī dhundlī rūheñ muhīb jangal ke rāstoñ par

bhaTak rahī haiñ

ulajhtī sāñsoñ kī saḳht girheñ

abhī talak jism par khīñchī haiñ

hamāre nīche kisī zamīñ kī kashish ho shāyad

yahīñ kahīñ dhund ke aqab meñ ho koī sūraj nikalne vaalā

havā ke gadle safar se aage chamakte lamhoñ kī rahguzar ho

na.e gulāboñ kī sar-zamīñ ho

magar pighalte badan ko tahlīl karne vaalī ajiib saa.at sadā aTal hai

hamārī ḳhvāhish ye nek saa.at hamārī āñkhoñ meñ ghul ke phaile

hamāre jismoñ kā dard pighle

hamārī ḳhvāhish ye nek saa.at sukūt ban kar taḌapte jismoñ meñ aa ke Thahre

ulajhtī sāñsoñ kī girheñ khole

ham us kī ḳhushbū ke pur-sukūñ malgaje añdhere kī gahrī lazzat ke muntazir haiñ

ham us kī ḳhvāhish meñ apne apne dhaḌoñ ke tābūt meñ bañdhe haiñ

hum ek muddat se dhund aur KHak mein muallaq

zamin ki KHushbu sahar ki aahaT ko DhunDte hain

hamari be-KHwab sard aankhon mein bujhte mausam ki rangaten TimTima rahi hain

hamare pairon ke niche miTTi pighal ke daldal bani hui hai

ulajhti sanson ki saKHt girhen

badan ke andar khinchi hui hain

niDhaal sadiyon ke faslon ka safar ki panw mein pal raha hai

dhaDon ke niche hamara saya

hamare jismon ko reza reza nigal raha hai

(2)

samundaron se hawa lipaT kar nai ruton ka visal mange

zamin ki KHushbu sahar ki aahaT ke dhundle KHwabon ka aks phaile

hamein yaqin hai hawa ke gadle safar se aage

chamakte lamhon ki rahguzar hai

nae gulabon ki sarzamin hai

hamare panw mein aane wale safar ki KHwahish taDap rahi hai

hamari aankhon mein bawle KHwab ka nasha hai

hum apne apne dhaDon ke tabut se nikal kar

baDhe ki suraj ka jism chhinen

zamin ki KHushbu ka khoj paen

hum ek muddat se sochte hain

ki aasman ke siyah patthar mein ab kiran ka shigaf utre

zamin ki patal se kashish ho

nae gulabon ki mast KHushbu badan mein phaile

magar wahi dhund ka safar hai

kaTi-phaTi sard ungliyon par lahu ke jugnu chamak chamak kar bikhar chuke hain

ragon ke reshon mein taza KHwahish ki kashmakash sard paD chuki hai

dhoen ke phande mein marne walon ke nam zehnon ki taKHtiyon se

utar rahe hain

saron pe karb-o-bala ke mausam ka saKHt KHema khincha hua hai

hawa pe likkhe hue hain nauhe

faza mein laTke hue hain chehre

ufuq pe TuTi hui lakiren

zamin pe phaile hue hain sae

samundaron se lipaTne wali hawa ki an-dekhi Doriyon ka

koi sira hath mein nahin hai

hamari palken udhaD chuki hain

tamam KHwabon ki dhundli ruhen muhib jangal ke raston par

bhaTak rahi hain

ulajhti sanson ki saKHt girhen

abhi talak jism par khinchi hain

hamare niche kisi zamin ki kashish ho shayad

yahin kahin dhund ke aqab mein ho koi suraj nikalne wala

hawa ke gadle safar se aage chamakte lamhon ki rahguzar ho

nae gulabon ki sar-zamin ho

magar pighalte badan ko tahlil karne wali ajib saat sada aTal hai

hamari KHwahish ye nek saat hamari aankhon mein ghul ke phaile

hamare jismon ka dard pighle

hamari KHwahish ye nek saat sukut ban kar taDapte jismon mein aa ke Thahre

ulajhti sanson ki girhen khole

hum us ki KHushbu ke pur-sukun malgaje andhere ki gahri lazzat ke muntazir hain

hum us ki KHwahish mein apne apne dhaDon ke tabut mein bandhe hain