خاک اور دھند کا سفر

ہم ایک مدت سے دھند اور خاک میں معلق

زمیں کی خوشبو سحر کی آہٹ کو ڈھونڈتے ہیں

ہماری بے خواب سرد آنکھوں میں بجھتے موسم کی رنگتیں ٹمٹما رہی ہیں

ہمارے پیروں کے نیچے مٹی پگھل کے دلدل بنی ہوئی ہے

الجھتی سانسوں کی سخت گرہیں

بدن کے اندر کھینچی ہوئی ہیں

نڈھال صدیوں کے فاصلوں کا سفر کہ پاؤں میں پل رہا ہے

دھڑوں کے نیچے ہمارا سایہ

ہمارے جسموں کو ریزہ ریزہ نگل رہا ہے

(۲)

سمندروں سے ہوا لپٹ کر نئی رتوں کا وصال مانگے

زمیں کی خوشبو سحر کی آہٹ کے دھندلے خوابوں کا عکس پھیلے

ہمیں یقیں ہے ہوا کے گدلے سفر سے آگے

چمکتے لمحوں کی رہ گزر ہے

نئے گلابوں کی سرزمیں ہے

ہمارے پاؤں میں آنے والے سفر کی خواہش تڑپ رہی ہے

ہماری آنکھوں میں باؤلے خواب کا نشہ ہے

ہم اپنے اپنے دھڑوں کے تابوت سے نکل کر

بڑھے کہ سورج کا جسم چھینیں

زمیں کی خوشبو کا کھوج پائیں

ہم ایک مدت سے سوچتے ہیں

کہ آسماں کے سیاہ پتھر میں اب کرن کا شگاف اترے

زمیں کی پاتال سے کشش ہو

نئے گلابوں کی مست خوشبو بدن میں پھیلے

مگر وہی دھند کا سفر ہے

کٹی پھٹی سرد انگلیوں پر لہو کے جگنو چمک چمک کر بکھر چکے ہیں

رگوں کے ریشوں میں تازہ خواہش کی کشمکش سرد پڑ چکی ہے

دھوئیں کے پھندے میں مرنے والوں کے نام ذہنوں کی تختیوں سے

اتر رہے ہیں

سروں پہ کرب و بلا کے موسم کا سخت خیمہ کھینچا ہوا ہے

ہوا پہ لکھے ہوئے ہیں نوحے

فضا میں لٹکے ہوئے ہیں چہرے

افق پہ ٹوٹی ہوئی لکیریں

زمیں پہ پھیلے ہوئے ہیں سائے

سمندروں سے لپٹنے والی ہوا کی ان دیکھی ڈوریوں کا

کوئی سرا ہاتھ میں نہیں ہے

ہماری پلکیں ادھڑ چکی ہیں

تمام خوابوں کی دھندلی روحیں مہیب جنگل کے راستوں پر

بھٹک رہی ہیں

الجھتی سانسوں کی سخت گرہیں

ابھی تلک جسم پر کھینچی ہیں

ہمارے نیچے کسی زمیں کی کشش ہو شاید

یہیں کہیں دھند کے عقب میں ہو کوئی سورج نکلنے والا

ہوا کے گدلے سفر سے آگے چمکتے لمحوں کی رہ گزر ہو

نئے گلابوں کی سر زمیں ہو

مگر پگھلتے بدن کو تحلیل کرنے والی عجیب ساعت سدا اٹل ہے

ہماری خواہش یہ نیک ساعت ہماری آنکھوں میں گھل کے پھیلے

ہمارے جسموں کا درد پگھلے

ہماری خواہش یہ نیک ساعت سکوت بن کر تڑپتے جسموں میں آ کے ٹھہرے

الجھتی سانسوں کی گرہیں کھولے

ہم اس کی خوشبو کے پر سکوں ملگجے اندھیرے کی گہری لذت کے منتظر ہیں

ہم اس کی خواہش میں اپنے اپنے دھڑوں کے تابوت میں بندھے ہیں