KHamoshi

lo maiñ ne qalam ko dho Daalā

lo merī zabāñ par taalā hai

lo maiñ ne āñkheñ bañd kar liiñ

lo parcham saare bāñdh liye

na.aroñ ko gale meñ ghoñT diyā

ehsās ke tāne-bāne ko

phir maiñ ne havāle daar kiyā

is dil kī kasak ko maan liyā

ek āḳhirī bosa denā hai

aur apne larazte hāthoñ se

ḳhanjar ke havāle karnā hai

lo maiñ ne qalam ko dho Daalā

lo merī zabāñ par taalā hai

ilzām ye aayad thā mujh par

har lafz mirā ek nashtar hai

jo kuchh bhī likhā jo kuchh bhī kahā

vo desh-virodhī bāteñ thiiñ

aur hukm kiyā thā ye sādir

tahzīb ke is gahvāre ko

jo merī nazar se dekhegā

vo ik mulzim kahlā.egā

lo maiñ ne qalam ko dho Daalā

lo merī zabāñ par taalā hai

jo ishq ke naġhme gā.egā

jo pyaar kī baanī bolegā

jo baat kahegā gītoñ meñ

jo aag bujhāne uTThegā

jo haath jhaTak de qātil kā

vo ik mujrim kahlā.egā

lo maiñ ne qalam ko dho Daalā

lo merī zabāñ par taalā hai

ḳhāmosh huuñ maiñ sannāTā hai

kyoñ sahme sahme lagte ho

har ek zabāñ par taalā hai

kyoñ sahme sahme lagte ho

lo maiñ ne qalam ko dho Daalā

lo merī zabāñ par taalā hai

haañ sannāTe kī guuñj suno

haiñ lafz vahī andāz vahī

har zālim jābir har qātil

is sannāTe kī zad par hai

ḳhāmoshī ko ḳhāmosh karo

ye baat tumhāre bas meñ nahīñ

ḳhāmoshī to ḳhāmoshī hai

gar phail ga.ī to phail ga.ī

lo main ne qalam ko dho Dala

lo meri zaban par tala hai

lo main ne aankhen band kar lin

lo parcham sare bandh liye

naron ko gale mein ghonT diya

ehsas ke tane-bane ko

phir main ne hawale dar kiya

is dil ki kasak ko man liya

ek aaKHiri bosa dena hai

aur apne larazte hathon se

KHanjar ke hawale karna hai

lo main ne qalam ko dho Dala

lo meri zaban par tala hai

ilzam ye aayad tha mujh par

har lafz mera ek nashtar hai

jo kuchh bhi likha jo kuchh bhi kaha

wo desh-wirodhi baaten thin

aur hukm kiya tha ye sadir

tahzib ke is gahware ko

jo meri nazar se dekhega

wo ek mulzim kahlaega

lo main ne qalam ko dho Dala

lo meri zaban par tala hai

jo ishq ke naghme gaega

jo pyar ki bani bolega

jo baat kahega giton mein

jo aag bujhane uTThega

jo hath jhaTak de qatil ka

wo ek mujrim kahlaega

lo main ne qalam ko dho Dala

lo meri zaban par tala hai

KHamosh hun main sannaTa hai

kyon sahme sahme lagte ho

har ek zaban par tala hai

kyon sahme sahme lagte ho

lo main ne qalam ko dho Dala

lo meri zaban par tala hai

han sannaTe ki gunj suno

hain lafz wahi andaz wahi

har zalim jabir har qatil

is sannaTe ki zad par hai

KHamoshi ko KHamosh karo

ye baat tumhaare bas mein nahin

KHamoshi to KHamoshi hai

gar phail gai to phail gai