KHamoshi

sabhī ne kahā dil lagānā ġhalat hai

magar maiñ ye samjhā zamānā ġhalat hai

ye merī ḳhatā hai sazā bhī mujhe de

du'ā bhī mujhe de qazā bhī mujhe de

agar ho sakā to kabhī lauT kar bhī

tujhe maiñ milūñgā yahīñ par kahīñ par

mirī ye jo duniyā tire hī liye thī

le maiñ chhoḌtā huuñ tirī sarzamīñ par

magar yaad rakhnā mirī 'āshiqī ko

mire saath guzrī vo har ik ghaḌī ko

mileñge agar ham kabhī is jahāñ meñ

to phir se suneñge usī ḳhāmushī ko

vahī ḳhāmushī jo hamāre laboñ pe

mulāqāt ke vaqt aatī thī aksar

vahī ḳhāmushī jo hamāre diloñ meñ

na.e pyaar ke giit gaatī thī aksar

mujhe hai ḳhabar sab badal sā gayā hai

magar ḳhāmushī ko ye kahte sunā hai

chalo aaj phir se vahī giit gaa.eñ

chalo apnī chāhat ko phir āzmā.eñ

sabhi ne kaha dil lagana ghalat hai

magar main ye samjha zamana ghalat hai

ye meri KHata hai saza bhi mujhe de

du'a bhi mujhe de qaza bhi mujhe de

agar ho saka to kabhi lauT kar bhi

tujhe main milunga yahin par kahin par

meri ye jo duniya tere hi liye thi

le main chhoDta hun teri sarzamin par

magar yaad rakhna meri 'ashiqi ko

mere sath guzri wo har ek ghaDi ko

milenge agar hum kabhi is jahan mein

to phir se sunenge usi KHamushi ko

wahi KHamushi jo hamare labon pe

mulaqat ke waqt aati thi aksar

wahi KHamushi jo hamare dilon mein

nae pyar ke git gati thi aksar

mujhe hai KHabar sab badal sa gaya hai

magar KHamushi ko ye kahte suna hai

chalo aaj phir se wahi git gaen

chalo apni chahat ko phir aazmaen