khiDki

merī jaisī nazmeñ likhne vaalī laḌkī

jis khiḌkī kī oT se mujh ko dekh rahī hai

us ke dhuñdle shīshoñ par sab aks haiñ

merī āñkhoñ se bahte paanī ke

aur naqsh haiñ us kī chaukhaT par un hāthoñ ke

us khiḌkī kī āñkhoñ se dekhā hai maiñ ne

achchhā aur burā lamha

aur andar aur bāhar ke sab mausam vahīñ se guzre haiñ

is khiḌkī ke aage girtā har manzar tasvīr kiyā

din kī ujlī aahaT ko ta.abīr kiyā

raat sitāroñ se bhar kar shīshoñ meñ uñDelī

apnī āñkheñ de kar taaq meñ phūloñ jaise ḳhvāb sajā.e

apne tan par gard lapeTī

khiḌkī par kahīñ jam nahīñ jaa.e

bāhar se aate kañkar patthar aur kāñTe

chupke se is dil meñ chhupā.e

khiḌkī kā koī bhī shīsha TuuT na jaa.e

bas itnī sī baat kā koī dhyān na aayā

khiḌkī āḳhir kisī bhī samt ko khul saktī hai

merī riyāzat merī mohabbat

tund havā ke is jhoñke se

aur bārish kī tez phuvār se

chand lamhoñ meñ ghul saktī hai

dhul saktī hai

meri jaisi nazmen likhne wali laDki

jis khiDki ki oT se mujh ko dekh rahi hai

us ke dhundle shishon par sab aks hain

meri aankhon se bahte pani ke

aur naqsh hain us ki chaukhaT par un hathon ke

us khiDki ki aankhon se dekha hai main ne

achchha aur bura lamha

aur andar aur bahar ke sab mausam wahin se guzre hain

is khiDki ke aage girta har manzar taswir kiya

din ki ujli aahaT ko tabir kiya

raat sitaron se bhar kar shishon mein unDeli

apni aankhen de kar taq mein phulon jaise KHwab sajae

apne tan par gard lapeTi

khiDki par kahin jam nahin jae

bahar se aate kankar patthar aur kanTe

chupke se is dil mein chhupae

khiDki ka koi bhi shisha TuT na jae

bas itni si baat ka koi dhyan na aaya

khiDki aaKHir kisi bhi samt ko khul sakti hai

meri riyazat meri mohabbat

tund hawa ke is jhonke se

aur barish ki tez phuwar se

chand lamhon mein ghul sakti hai

dhul sakti hai