KHud-kushi aur qatl

vo apne hāthoñ ko dekhtī hai

hinā kī rangat pe sochtī hai

vo sochtī hai ye mere hāthoñ pe jo lagī hai

hinā nahīñ hai

mire azīzoñ ne mere ḳhvāboñ kā qatl kar ke

jo ḳhuuñ bahāyā

vo ḳhuun bah kar mirī hathelī pe aa gayā hai

mirī tamanna kā ḳhuun jis ne hinā sī rangat bikher dī hai

ye nāch-gāne kī jo sadā.eñ maiñ sun rahī huuñ

ye naach kyā hai ye giit kyā hai

ye mere ḳhvāboñ kā marsiya hai

ye mātamī haiñ jo giit gaate haiñ nāchte haiñ

ye surḳh joḌā mire badan par

libās kab hai

ye merī ḳhvāhish hai jo kafan meñ paḌī huī hai

vo sab barātī yahāñ pahuñch kar

uThā ke ḳhvāhish kā ye janāza

nikal paḌeñge

vo sochtī hai

abhī to mujh ko qubūl karnā hai jurm apnā

vo jab kaheñge ye qatl hai yā ye ḳhud-kushī hai

mujhe batānā hai ḳhud-kushī hai

baġhair soche qubūl kahnā paḌegā mujh ko

ye qatl kab hai ye ḳhud-kushī hai

vo apne hāthoñ ko dekhtī hai

vo sochtī hai

wo apne hathon ko dekhti hai

hina ki rangat pe sochti hai

wo sochti hai ye mere hathon pe jo lagi hai

hina nahin hai

mere azizon ne mere KHwabon ka qatl kar ke

jo KHun bahaya

wo KHun bah kar meri hatheli pe aa gaya hai

meri tamanna ka KHun jis ne hina si rangat bikher di hai

ye nach-gane ki jo sadaen main sun rahi hun

ye nach kya hai ye git kya hai

ye mere KHwabon ka marsiya hai

ye matami hain jo git gate hain nachte hain

ye surKH joDa mere badan par

libas kab hai

ye meri KHwahish hai jo kafan mein paDi hui hai

wo sab baraati yahan pahunch kar

uTha ke KHwahish ka ye janaza

nikal paDenge

wo sochti hai

abhi to mujh ko qubul karna hai jurm apna

wo jab kahenge ye qatl hai ya ye KHud-kushi hai

mujhe batana hai KHud-kushi hai

baghair soche qubul kahna paDega mujh ko

ye qatl kab hai ye KHud-kushi hai

wo apne hathon ko dekhti hai

wo sochti hai