KHud-kushi ke pul par

ḳhud-kushī ke pul par

samundar kī lahroñ meñ bahtī

fasurda o nākām

jismoñ kī rūheñ

bulātī haiñ mujh ko

chale aao har ġham se dāman chhuḌā lo

miTā do

fanā hone vaale badan ko miTā do

fanā se na Darnā

yahī asl meñ zindagī hai

isī meñ haqīqī ḳhushī hai

samundar kī lahroñ meñ

sayyāl rūhoñ ke

gītoñ meñ behad kashish hai

ye dil chāhtā hai

ki maiñ jā milūñ un se

un sā hī ho jā.ūñ

par maiñ unheñ kis tarah ye batā.ūñ

ki ai iztirāb-e-musalsal ke girdāb meñ qaid ruuho

mujhe tum se hamdardī hai

pyaar hai

maiñ ḳhud chāhtā huuñ

man o tū kī saarī fasīleñ phalāgūñ

magar kyā karūñ

kuchh muqaddas se rishte

duā-go sī āñhkeñ

mujhe yaad aatī haiñ

chup-chāp ghar lauT aatā huuñ maiñ

un hasīñ pyāre logoñ kī ḳhātir to

jiinā paḌegā

ye zahrāb piinā paḌegā

KHud-kushi ke pul par

samundar ki lahron mein bahti

fasurda o nakaam

jismon ki ruhen

bulati hain mujh ko

chale aao har gham se daman chhuDa lo

miTa do

fana hone wale badan ko miTa do

fana se na Darna

yahi asl mein zindagi hai

isi mein haqiqi KHushi hai

samundar ki lahron mein

sayyal ruhon ke

giton mein behad kashish hai

ye dil chahta hai

ki main ja milun un se

un sa hi ho jaun

par main unhen kis tarah ye bataun

ki ai iztirab-e-musalsal ke girdab mein qaid ruho

mujhe tum se hamdardi hai

pyar hai

main KHud chahta hun

man o tu ki sari fasilen phalagun

magar kya karun

kuchh muqaddas se rishte

dua-go si aanhken

mujhe yaad aati hain

chup-chap ghar lauT aata hun main

un hasin pyare logon ki KHatir to

jina paDega

ye zahrab pina paDega