KHud-kushi

vo raat gahrī

us par TūTte jismoñ kā bojh

jhoñpaḌoñ meñ ūñghte nange charāġhoñ kī bhaḌak

karb kā elaan taaza

yak-ba-yak

masjidoñ meñ jal uThī na.aroñ kī bosīda zabāñ

thartharā kar gir paḌe sajdoñ meñ log

goliyoñ kī taḌtaḌāhaT

ḳhuun mash.al zulm maut

ḳhanjaroñ ke paañv se rauñdī huī doshīzgī

kuchh nahīñ kuchh bhī nahīñ hai

ḳhauf se larzāñ sharāfat ḳhud-kushī kā naam hai

bandagī puujā ibādat is liye badnām hai

sab gañvā kar gaañv vaale giḌgiḌāte rah ga.e

gaañv kī sab beTiyāñ Daaku uThā kar le ga.e

pāsbāñ ḳhāmosh haiñ ahl-e-siyāsat bhī ḳhamosh

rishvatoñ par bikne vaalī har adālat bhī ḳhamosh

wo raat gahri

us par TuTte jismon ka bojh

jhonpaDon mein unghte nange charaghon ki bhaDak

karb ka elan taza

yak-ba-yak

masjidon mein jal uThi naron ki bosida zaban

tharthara kar gir paDe sajdon mein log

goliyon ki taDtaDahaT

KHun mashal zulm maut

KHanjaron ke panw se raundi hui doshizgi

kuchh nahin kuchh bhi nahin hai

KHauf se larzan sharafat KHud-kushi ka nam hai

bandagi puja ibaadat is liye badnam hai

sab ganwa kar ganw wale giDgiDate rah gae

ganw ki sab beTiyan Daku uTha kar le gae

pasban KHamosh hain ahl-e-siyasat bhi KHamosh

rishwaton par bikne wali har adalat bhi KHamosh