KHuda

jo banā de hazrat-e-ādam ko murda ḳhaak se

kar de jo ārāsta be-jāñ ko rūh-e-pāk se

nuuh kī kashtī ko tūfānoñ se bhī jo le bachā

bahr meñ jo hazrat-e-mūsā ko de de rāsta

ho kueñ kī tah se taḳht-o-tāj tak yūsuf ke saath

peT meñ machhlī ke yūnus ko rakhe jo bā-hayāt

narm jo lohe ko kar de haath meñ dā.ūd ke

ibn-e-mariyam ko bachā le jo salīb-o-dār se

mustarad kar de jo ahl-e-haq pe har yalġhār ko

nuur kar de jism-e-ibrāhīm par jo naar ko

jo sikhā de mānñā farmān har maḳhlūq ko

jo sulaimāñ par kare āsān har maḳhlūq ko

zālimoñ ko rok de jo pal meñ un kī Toh se

nāqa-e-sāleh kare paidā jo batn-e-koh se

amn kā sunvā de jo muzhda rasūlullāh se

jo chaman sahrā ko de banvā rasūlullāh se

vaqt jo maġhrib kā Thahrā de rasūlullāh se

chāñd do TukḌe jo karvā de rasūlullāh se

jis ḳhudā-e-pāk kī qudrat ke hoñ ye sab nishāñ

hamd jis kī kar rahī hoñ machhliyāñ aur chyūñTiyāñ

jis kī 'azmat kī gavāhī roz deñ shām-o-sahar

kar rahe hoñ chāñd sūraj hukm se jis ke safar

har zabāñ-āvar jahāñ thak jaa.e jis ke zikr se

jis kī satvat kā bayāñ bāhar ho sab kī fikr se

mashvara tum sab ko itnā de ke ab maiñ bhī yahāñ

ḳhatm karnā chāhtā huuñ ḳhud pe hī apnā bayāñ

vasvasoñ ke tum maraz meñ mubtalā honā nahīñ

us ḳhudā se kuchh bhī ho be-āsrā honā nahīñ

jo bana de hazrat-e-adam ko murda KHak se

kar de jo aarasta be-jaan ko ruh-e-pak se

nuh ki kashti ko tufanon se bhi jo le bacha

bahr mein jo hazrat-e-musa ko de de rasta

ho kuen ki tah se taKHt-o-taj tak yusuf ke sath

peT mein machhli ke yunus ko rakhe jo ba-hayat

narm jo lohe ko kar de hath mein daud ke

ibn-e-mariyam ko bacha le jo salib-o-dar se

mustarad kar de jo ahl-e-haq pe har yalghaar ko

nur kar de jism-e-ibrahim par jo nar ko

jo sikha de manna farman har maKHluq ko

jo sulaiman par kare aasan har maKHluq ko

zalimon ko rok de jo pal mein un ki Toh se

naqa-e-saleh kare paida jo batn-e-koh se

amn ka sunwa de jo muzhda rasulullah se

jo chaman sahra ko de banwa rasulullah se

waqt jo maghrib ka Thahra de rasulullah se

chand do TukDe jo karwa de rasulullah se

jis KHuda-e-pak ki qudrat ke hon ye sab nishan

hamd jis ki kar rahi hon machhliyan aur chyunTiyan

jis ki 'azmat ki gawahi roz den sham-o-sahar

kar rahe hon chand suraj hukm se jis ke safar

har zaban-awar jahan thak jae jis ke zikr se

jis ki satwat ka bayan bahar ho sab ki fikr se

mashwara tum sab ko itna de ke ab main bhi yahan

KHatm karna chahta hun KHud pe hi apna bayan

waswason ke tum maraz mein mubtala hona nahin

us KHuda se kuchh bhi ho be-asra hona nahin