Khudawanda ye kaisa jabr hai

ḳhudāvandā ye kaisā jabr hai

maiñ ne tirī rassī ko pakḌā hī nahīñ lekin

mujhe rassī ne jakḌā hai

mujhe kahte haiñ tum āzād ho, apne liye chun lo

magar bahr-e-fanā ko jaane vaale mujh ko rukne hī nahīñ dete

maiñ ruknā chāhtā huuñ

us hasīñ ke aan milne tak ki jo raste meñ pīchhe rah ga.ī thī

bayābān-e-numū kī be-karāñ tārīkiyoñ meñ

an-ginat rūhoñ kī dhakkam-pel thī

tab bhī vahī jhūTī kahānī thī

ki tum āzād ho lekin

añdherā bhiiḌ aur vahshat meñ lambī ġhaar ke parle sire par

TimTimātī raushnī tak sab ko aanā thā

vo pīchhe rah ga.ii, maiñ jabr kī rassī meñ jakḌā ġhaar se bāhar nikal aayā

maiñ ruknā chāhtā huuñ us hasīñ ke aan milne tak

ki jo raste meñ pīchhe hai

maiñ us kā muntazir huuñ kitne barsoñ se

ḳhudāvand-e-fanā!

maiñ terī rassī ke ka.ī bal khol kar

umr-e-ravāñ ke zahr se bachtā rahā huuñ

phir bhī merā jism jo hastī ke jauhar kā libāda hai

purānā ho gayā hai

maiñ ruknā chāhtā huuñ us hasīñ ke aan milne tak

ki jab us kā labāda bhī purānā ho

to ham mil kar tire bahr-e-fanā ke is kināre par

purāne pairahan dho leñ

phir is ke ba.ad bhī terī yahī zid ho to le jānā!!

KHudawanda ye kaisa jabr hai

main ne teri rassi ko pakDa hi nahin lekin

mujhe rassi ne jakDa hai

mujhe kahte hain tum aazad ho, apne liye chun lo

magar bahr-e-fana ko jaane wale mujh ko rukne hi nahin dete

main rukna chahta hun

us hasin ke aan milne tak ki jo raste mein pichhe rah gai thi

bayaban-e-numu ki be-karan tarikiyon mein

an-ginat ruhon ki dhakkam-pel thi

tab bhi wahi jhuTi kahani thi

ki tum aazad ho lekin

andhera bhiD aur wahshat mein lambi ghaar ke parle sire par

TimTimati raushni tak sab ko aana tha

wo pichhe rah gai, main jabr ki rassi mein jakDa ghaar se bahar nikal aaya

main rukna chahta hun us hasin ke aan milne tak

ki jo raste mein pichhe hai

main us ka muntazir hun kitne barson se

KHudawand-e-fana!

main teri rassi ke kai bal khol kar

umr-e-rawan ke zahr se bachta raha hun

phir bhi mera jism jo hasti ke jauhar ka libaada hai

purana ho gaya hai

main rukna chahta hun us hasin ke aan milne tak

ki jab us ka labaada bhi purana ho

to hum mil kar tere bahr-e-fana ke is kinare par

purane pairahan dho len

phir is ke baad bhi teri yahi zid ho to le jaana!!